熱門:

2021年2月17日 即巿股評 港股直擊

【盤房來料】好醫生剛獲女股神入場 升勢料可持續

隔晚美股個別發展,道指創收市新高,標指跟納指盤中創新高後回軟,港股今早低開,雖然北水仍然休假未回歸,但港股仍然充滿活力,低開高走,再創32個月新高。恒指低開110點,最多一度跌243點,見30503點半日低位,之後回勇,最多升209點,見30955點半日高位。中午恒指報收30946點,升199點;國指升134點,報收12171點;恒科指半日升79點,報10774點。

拜登都學識出口術,佢話經濟刺激方案規模愈大愈好,同時建議7月底前為所有美國人接種肺炎疫苗,呢個消息令投資者感到興奮,確定今年美國以至全球經濟可以堅實地復甦,再加上喺各國央行維持寬鬆貨幣政策下,資金充裕至泛濫程度,推動股市持續向上。

藍籌股普遍做好,只有舜宇(02382)半日跌2.8%,成為表現最差藍籌股;友邦(01299)亦見回氣,半日跌0.7%;相反平保(02318)則見資金追捧,半日升3.1%。阿Man一直唔睇好嘅大笨象(00005)呢期總算爭返口氣,尋日急升後今日升勢得以保持,再升1.4%,總算突破45元企穩,但上唔上返到去50元,即係去年宣布暫停派息之前嘅水平,可能要睇下周二公布業績後先有結果。騰訊(00700)跟美團(03690)今日止跌回升,但上升力度一般,半日兩股升不足1%,可能要靠北水明日回歸先再有動力。

雖然有缸邊友擔心北水回歸後唔係入場買貨係沽貨,明日反而係反高潮,不過暫時資金都係喺不停板塊之間輪動,而未見有離場跡象。由年初至今,北水累計買入港股近3000億元,而內地在岸互惠基金喺1月份熱銷,截至1月底已吸納近4000億元人民幣,打破去年7月所創3,250億元人民幣舊紀錄。由於A股龍頭股估值已被推高,南向資金已轉投港股懷抱。而北水流入港股,唔會短短一兩個月就停手,尤其內地限制銀行銷售高息產品,甚至刹停相關產品銷售,令更多民間資金流入互惠基金,無論公募或私募基金均出現爆數熱銷狀況,預期今年全年流入港股北水可達萬億元規模。

除咗北水積極買入港股,由美國女股神Catherine Wood主理嘅ETF,亦開始投放更多資金於中概股上,獲女股神去年10月建倉嘅移卡(09923)再獲其ETF增持,股價半日急升17.2%,變身紅底股兼創新高。而上周女股神開始建倉嘅平安好醫生(01833)成為其新寵,已連續第三日入場掃貨,其股價今早低開後,即見承接,半日已倒升。由於好醫生剛獲女股神入場,相信升勢可以喺女股神繼續掃貨下持續。

麥狄文

(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads