美股隔晚三大指數齊升，除咗最近公布嘅就業及經濟數據表現唔錯之外，踏入業績期唔少企業派嘅成績表都夠晒靚仔見得人，標指跟納指再創新高，相信一班一直口淡淡喊驚大叫股災將至嘅大淡友，心中肯定不是味兒。港股今早隨美股向上，雖然早段曾升382點，但唔少重磅科技股腳軟，恒科指輸嘅同時，大市升幅亦收窄。
恒指高開點191點，報29305，開市已重上10日線(29147)，升幅一度擴大至382點，高見29495，但周末效應下，未見買盤積極跟進，大市升幅收窄至只剩70點，低見29184。臨近午市重拾動力，最終恒指半日收報29265，升152點；國企指數升18點，報11582；恒生科技指中午收9866，倒跌30點。
友邦(01299)跟大笨象(00005)今日分別升1.3%及1.6%，貢獻恒指70點升幅；仲有建行(00939)跟港交所(00388)分別升1%及1.7%，齊齊撐大市。雖然小米(01810)已澄清旗下手機唔支援Google 服務為謠言，唔知係咪場智者唔夠，股價半日再跌3.8%。不過阿Man呢個小米大好友，就把握機會低位掃小米，小米殺牛行動已殺得七七八八，雖然仍有一注重牛喺25元左右，但現價買入小米，最多跌穿24打靶，兩個幾博佢短線重上30，中長線梗係睇返一萬億市值40元，咁嘅值博率，唔係唔博一博，單車可以變摩托呀……
講開小米睇佢中長線有一萬億市值，今日首掛嘅快手(01204)，一開波338元，最高見345元，較招股價115元升足兩個開，但唔少人都選擇食糊，中午報收303.6元都升一個開有突，估計喺未有北水入場前，快手都係咁上下，IPO抽有快手食糊好合理，況且現價市值去到萬二億，高出小米一倍，咁嘅情況下，阿Man寧願揀小米都唔揀快手。
除咗小米之外，阿里(09988)亦係值得收集嘅優質股，之前困擾公司嘅利淡因素，包括螞蟻集團上市計劃泡湯，以及集團首腦衰多口等等，已成過去，螞蟻跟監管機構達成協議，進行重整計劃，相關計劃最快喺春節假期前有公布，250至260元係一個收集靚價區域，買入以220元為止蝕參考，肯坐中線定必有理想回報。先唔好講大半年前，騰訊(00700)跟阿里咁高咁大，騰訊就屢創新高，市值已突7萬億，晉身萬億美元超級巨企，但阿里仲喺原地踏步，市值跟去年中五萬幾億相約，只要阿里肯發力追一追，上返7萬億市值，阿里股價已見330元水平，亦係大行平均目標價。當然阿里能否如龜兔賽跑中嘅烏龜後來居上，市值追得過騰訊，咁就要睇「港股通」今年內能否納入第二上市股份，只要一放閘北水買阿里，阿里股價重返300水平易如反掌。
麥狄文
(徐狄怡‧證監會持牌人)
