美國隔晚就業數據表現幾好，但美股表現較為呆滯，因市場擔心就業市場好轉，令新一輪刺激經濟方案再度推遲。不過今早亞太區股市偏軟，港股三日彈過一千點後，今日回軟，二萬九關再度失守，10日線(29146點)及20日線(28961點)得而復失。
恒指低開213點，其後曾止跌回升101點，見29409點半日高位又再掉頭向下，10日線失守後跌幅擴大，20日線及二萬九關亦失守，半日最多跌467點，見28840點半日低位。恒指中午報收28882點，跌422點；國指跌186點，報收11464點；恒科指重返萬點之下，半日跌401點，報收9724點。
阿Man都預咗市況持續反覆，彈咗三日但唔企穩10及20日線，二萬九關都唔係乜嘢位，預計呢段時間，恒指或於28200至29500點之間上落。重磅藍籌股大部份唔多精神，友邦(01299)跟大笨象(00005)分別跌0.4%及0.8%，之前創咗新高嘅舜宇(02382)亦跌5.4%，抹去尋日全部升幅。至於表現最好嘅係平保(02318)，派完成績表半日逆市升2.6%。
科技股今日跌勢較為顯著，咁之前騰訊(00700)、美團(03690)呢啲升咁多，回吐都好正常，唔回一回又邊有位畀未有貨嘅缸邊友上車，半日分別跌2.7%及6%。相反阿里(09988)之前吽咗咁耐，噚日有消息指集團旗下螞蟻集團跟中國監管機構就重組計劃達成協議，將螞蟻轉變為一家金融控股公司，跟隨與銀行類似嘅資本需求。相關重組計劃，有可能下星期春節假期前公布。市場憧憬螞蟻重組完成後，重新研究IPO。不過提一提大家，螞蟻重組需時幾耐，同埋重組完成後再重啟上市計劃，最快可能都要下半年。
小米(01810)新版MIUI無法安裝Google嘅GMS，包括 Google Play Store、Gmail、YouTube等都無法正常使用，而小米解答組人員回應表示：「MIUI 國內版出於合規原因，未預置Google 服務框架的機型，不再支持自行安裝GMS服務。」至於國際版有冇出現呢個問題，暫時未有消息，不過熟悉國情嘅朋友都知道，內地唔用VPN，唔翻牆係用唔到Google嘅，咁如果翻咗牆，咁就乜鬼都用得，一直以嚟都係咁。今日小米股價急跌都係借呢個消息殺一殺牛證，目前牛證重貨區喺26至28元，殺到落26左右，預計小米會有支持，嗰啲位亦剛好係100日線附近。其他科技股大大小小都見回調，但呢個時候正好係阿Man所指回調時選擇優質股撈貨嘅好機會，700蚊邊嘅騰訊，390樓下嘅美團、26附近嘅小米，全部都係有子彈應該要掃貨嘅對象。
麥狄文
(徐狄怡‧證監會持牌人)
