熱門:

2021年1月27日 即巿股評 港股直擊

【盤房來料】大牛市波幅擴大 無需介懷期間上落

隔晚美股表現偏軟,加上市場擔心中行調整政策,隨時收水,港股喺噚日跌逾700點,今早半日呈拉鋸局面,喺10日線(29391)附近好淡爭持。恒指早段高開165點後,升幅一度擴大至245點,見29636點半日高位,但A股唔爭氣,跌逾1%,拖累港股掉頭回落,半日最多跌196點,見29194點半日低位。不過低位即見買盤入場撈貨,恒指10日線失而復得,半日恒指喺10日線附近爭持。恒指中午報收29454點,升62點;國指半日升28點,中午報收11724點;恒科指半日報收9885,跌81點。

阿爺放風只要螞蟻聽聽話話,上市計劃大可捲土重來,雖然最快要今年下半年先可以重啟上市申請,但消息利好阿里巴巴(09988)逆市向上,半日升3.3%,為恒指貢獻50點升幅,幫手撐住大市。今日被北水熱捧嘅重磅股繼續回吐,反而輪到傳統股有資金流入,平保(02318)跟大笨象(00005)分別升0.1%及1.3%;中海油(00883)半日更升4.6%,成為最大升幅藍籌。

不過今日騰訊(00700)跟美團(03690)呢兩隻北水愛股就回軟,留意係去到低位即見買盤湧入,唔少之前北水勁買,同熱炒股都出現同樣情況,反映市場資金無懼大市短線調整,反而把握回調低吸機會。今日阿Man都係睇住長線睇好嘅小米(01810)同吉利(00175)有冇靚位上車,小米30元樓下係靚價,吉利難買平貨,32元樓下買到都算唔錯。

另外亦吼實已公布將申請回A嘅聯想集團(00992),當眾多中科企業炒到甩轆,PE閒閒地四五十倍嘅時候,即使聯想由四個幾起步已倍升,其現價市盈率只有22倍左右,預測市盈率更不足20倍,主要係市場仍將其視為PC生產商,而無去好好了解公司喺創新實力,以及打造高增長業務嘅潛力。況且以現水平不足20倍預測市盈率回A,亦未免太過失禮。估計喺聯想回A前,會好似中芯(00981)回A前一樣,炒高一倍亦好合理。以其公布回A時股價約8元水平計算,股價爆升一倍即係16元,亦剛好升破其歷史高位。

不過光伏股及CRO醫藥股沽壓未完,有心想執平貨不如睇定啲,寧買貴,莫買錯,睇多兩日等走勢喘穩,再搵位上車亦未遲。其實大市升至現水平,尤其唔少股份累計升幅驚人,單日升兩成預計波幅會擴大,單日調整跌5至10%好平常。要喺大時代贏大錢,就要揀優質股坐定定,搵個靚位上車,期間波幅無需太介懷,當然自問泳術唔錯,有信心把握期間波幅,扲部份貨出嚟游吓水,減低成本,亦係可以令坐貨坐得更舒服嘅方法。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads