熱門:

2021年1月25日 即巿股評 港股直擊

【盤房來料】阿里巴巴雨過天青發力追落後

美股周五個別發展,納指再創收市新高,但愈來愈多專家淡友上身,指美股隨時爆煲,但阿Man就定過抬油,暫時睇唔到有乜嘢跡象股災會出現,至少喺資金極度充裕嘅情況下,而華府又準備推出高達19000億美元嘅刺激經濟方案,點計條數美股都唔使死。

恒指高開229點,早段升幅曾縮水225點,見29673點半日低位,其後大市再發力,恒指重上三萬大關,最多升625點,見30073點半日高位。恒指中午收報30057點,升609點;國企指數報11939點,升261點;恒科指推出後首次升穿一萬點大關,最高見10174點,半日升4.1%。

藍籌股個別發展,港交所(00388)、創科(00669)跟申洲(02313)創新高,半日分別升6.7%、3.4%及6.5%;當然科技股表現更勇猛,騰訊(00700)半日升8.3%;美團(03690)升5.5%,雙雙創新高,主要係因為得到大行加持,調升目標價。另一破頂藍籌為舜宇(02382),半日升4.3%,舜宇跑贏瑞聲(02018)幾十條街,呢樣嘢阿Man一早已講咗,手機嘅語音系統只得一個,但鏡頭可以發展到前後置,前前後後加埋可以N個鏡頭,呢個亦係阿Man只係推介舜宇,而唔推介瑞聲嘅主要原因。有時炒股只需要用常識,將自己日常生活嘅經驗去分析,自然就得出答案,究竟邊隻股票更值得買入及持有。

JATMX當中,今日只有小米(01810)同阿里巴巴(09988)未跟隨大隊尋頂,而當中又以阿里巴巴表現最落後。自螞蟻集團上市計劃難產,馬雲又衰多口得罪阿爺,做咗隱閉中年兩個月後最近再露面,大家都視為一個正面訊息,似乎阿爺應該下咗啖氣,馬雲解禁後,阿里股價亦生猛返。阿里股價半日重上260元水平,只要進一步升破264元企穩,大約係100日線,阿里應該可以脫胎換骨。阿里雲係阿里巴巴嘅殺手繝,目前阿里雲係全國最大嘅雲計算供應商,市佔率超過三成,係市場領頭羊,亦拋離市佔率第二位嘅華為雲一倍有多,相信今年阿里嘅雲業務唔單止可以扭虧為盈,將來仲會成為阿里巴巴嘅主要生財工具。現水平買入阿里巴巴,單係追落後創新高,已經有超過一成升幅,但阿Man睇嘅並唔係前高位300元咁簡單,而多間大行畀嘅目標價亦係350元樓上,現價買入阿里絕對係一個舒服買入價。

新能源汽車今日亦落鑊,恒大汽車(00708)獲華人置業(00127)大股東兼執行董事陳凱韻(甘比)股價半日急升;而其他新能源汽車股全線做好,龍頭比亞迪(01211)半日升7.5%亦新高,相對阿Man另一心儀汽車股吉利汽車(00175)半日升近7%,但距離合理目標價仍有一大段距離。預期吉利今年可以拾級而上,股價要見半百問題唔大,對於睇得最樂觀嘅花旗,50元目標經已打咗個折扣。

麥狄文

(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads