今日係平安夜,港股得半日市,過埋今日之後就係一年連幾嘅聖誕節假期,明白受疫情影響可能Party大減,不過,難得嘅一個長假期靜靜地喺屋企同屋企人過,都係另一種快樂!
依家9點29分,恒指開市幾近平開,微跌0.23點,開市報26342點。今朝比較焦點嘅新聞就係市場監管總局依法對阿里巴巴(09988)涉嫌壟斷行為立案調查,做完U盤後阿里低開3%,至依家9點40分,阿里最低見過229.4元,一度失守250天線$232.74,日線圖見阿里股價跌穿保歷加通道以外範圍,但同步都留意到SlowSTC(14,3)都已經回到落超賣水平,不過依家所見嘅「錘頭」唔知可以唔可捱到收市,再捱埋個聖誕?因為都見到條%K線向下走嘅速度有少少收油,當然,安全計就更係等%K線正式升穿%D線先啦。
至於條恒指,今朝微跌不足1點開市,到正式開市後26221點,以5分鐘圖計喺呢個位出現「平底」後恒指忽然發力向上,就連條SlowSTC(14,3)只係落到中軸都被佢叫返佢上去,上到依家差唔多10點,恒指一度進入26400點,即首層熊證街貨範圍,SlowSTC(14,3)再次回到上超買位置,%K線已經掉頭向下,準備跌穿%D線,呢個時候day trade隻恒指熊(58047),收回價26688點,距離現價有約400點,槓桿成45.32倍,半日市嚟講夠激刺啦希望今晚可以加餸啦!
今日半日市,[下半part]當然無啦,而下個星期就係我最強嘅清假週,係放足一個星期至到下個再下個星期一(2021年1月4日)先返工,所以唔單止[下半part],連[輪證贏家]都會放假,只係得聊天室同埋Patreon照常營業(都唔係呀,聊天室都要暫停兩日,係Patreon如常運作咋)
在此,預祝大家有個美好嘅聖誕節同新年,2021年見!
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/IG/Patreon:輪證贏家
秒投聊天室:輪證教室