雖然美國疫情愈爆愈勁，但疫苗研發又有新進展，阿斯利康跟牛津大學聯合研發嘅疫苗第二階段試驗顯示，該疫苗99%受試者施打疫苗後成功出現抗體，尤其是對老年人產生強大免疫反應。美股扭轉過去兩日跌勢，不過疫苗始終未能量產，美國疫情愈趨嚴重下，投資者又轉軚買番科技股。話咗資金喺新舊經濟股之間穿梭，疫情消息影響資金流向。不過國會有意重啟新一輪刺激方案談判，對股市嚟講都係利好消息。
港股今早表現反覆，恒指開市升49點，但市場憂慮第四波疫情爆發，大市一度倒跌43點，低見26313點，但10日線(26301點)有強勁支持，大市再度回升，最多升207點，見半日高位26564點，其後升勢回順，升幅收窄。恒指半日報收26449點，升92點；國指升2點，報收10557點；恒科指喺下周二推出期貨前表現不俗，半日升90點，報收7993點，未知能否重上八千大關。
港股表現唔差，只係第四波疫情又殺到，又刺激香港電視(01137)呢隻疫情股代表急升，半日升8.7%，走勢唔錯，雖然冇人想發疫情財，但事實係疫情一嚴重，港視又落鑊。睇個款衝上12元企穩，隨時又跟住疫情惡化創新高，現價追入以今日開市價作止蝕，博佢衝番上14元高位。而科技股同樣係疫情避險股，今日JATMX全部上升，而小米(01810)績前強勢，已進一步逼近歷史高位。留意小米下周二收市後業績，派成績表前炒得勁，升得急，好似京東(09618)咁，不妨喺下周二當日食一食糊先無壞。總之呢幾日科技股隨住疫情惡化再抬頭，之前有趁調整收集嘅，不妨把握機會短炒食糊。
雖然汽車股本屬舊經濟股，但環保大趨勢下，產業鏈已起變化，新能源汽車比例將持續增加，內地10月份國務院通過一項關於新能源汽車產業發展規劃，要求自2021年起，在指定綠色生態地區新增嘅巴士、的士、物流配送等屬於公共領域車輛，新能源汽車比例不能低於80%。比亞迪(01211)早着先機，又係內地新能源汽車龍頭，今年升幅當然強功。而吉利(00175)日前宣布與德國平治母公司戴姆勒加強合作，研發可以電氣化新一代混合動力汽車(hybrid vehicles)引擎，有機會成為內地新能源汽車後起之秀，股價近日急升突破重型蟹貨區，只要守穩22元之上，可向24-25元挑戰，隨住新能源汽車引擎業務發展，未來估值提高，有望再創新高，值得留意。
麥狄文
(徐狄怡‧證監會持牌人)
