美股隔晚個別發展，之前疲憊不堪嘅舊經濟股呢幾日咸魚翻生，道指再升逾200點，但標指跟納指則下跌，科技股跌勢顯著。港股呢邊情況一樣，望住恒指都無乜事，但望望個恒科指走晒樣，單日跌逾5%，阿Man全倉新經濟股，當然覺得市況差到一個點。口痕友講笑話今日係雙十一購物節，科技股特價日喎…….阿Man想問句，咁今日買科技股有冇包郵，係咪一定賺先。
睇番恒指低開74點，早段曾跌114點，見26187點半日低位，其後反彈倒升131點，見半日高位26432點，又反覆回軟。中午恒指報收26281點，跌20點；國指半日跌31點，報收10555點；恒科技半日跌5.6%，收報7515點。
舊經濟股撐起大市，尤其一對重磅金融股大笨象(00005)同友邦(01299)分別升3.7%及1%，但友邦創完新高出陰燭，90元冇企穩，有貨食糊都正常。消費股表現較佳，蒙牛(02319)半日破頂升1.2%；其他舊經濟股普遍上升，一直持有呢批舊經濟股嘅老股民，呢兩日談笑風生，又覺得自己幾叻幾叻咁。其實呢幾日舊經濟股大幅反彈也好，距離今年高位尚頗遠路程，個別股份現價仍較高位低超過五成，有型嗰一兩日有鬼用咩。雖然新經濟股急挫，但大部份科技股十居其九仍然較今年低位高出一大截，雖然已有唔少科技股經呢兩日大洗太平地後，股價已較高位回落一兩成，不過科技股一旦發彈，力度肯定強勁過傳統股多多聲，主要原因係呢類股份長面冇乜蟹貨，唔似得傳統股層層蟹貨要等消化。
雙十一購物節電商銷售額又刷新紀錄，至慘係電商股本身都大特價平賣，失言得罪阿爺嘅阿里(09988)今日再插深啲，半日跌近9%；京東(09618)半日亦跌逾8%。騰訊(00700)，美團(03690)跟小米(01810)都做緊特價，值得留意係騰訊明日派績表，預咪業績優於市場預期，股價50日線為547元，未知午後會否再質低啲。落到50日線先叫有支持，半日曾反彈至584元水平，剛好亦係前支持位，暫時支持變阻力。阿Man愛股之一嘅小米(01810)有大行出報告指一旦華為出售榮耀，料小米估值及盈利有潛在下滑風險，股價半日插出5.7%。
科技股跌勢咁急，有貨喺手要唔要先撤退?? 阿Man之前一跌提住高位要減磅，連續兩日急插令新經濟股股價回落至有吸引力水平。不過新經濟股上半場以接近低位收市，而大市成交亦急增，反映呢啲股票暫時沽壓未除，唔排除要震埋呢兩日。至於噚日買咗第一注貨而坐晒艇嘅缸邊友，今日猶疑緊再加唔加注好，畀個貼士大家。睇住JATMX之餘，要買貨最好揀北水可以掃貨嘅成員，即係阿里(09988)跟京東(09618)冇北水就弱啲，其他有北水支持嘅新經股彈都彈得快人一步。
麥狄文
(徐狄怡‧證監會持牌人)
