輝瑞一聲話疫苗臨床數據理想，對九成無感染嘅測試者有效，美股開市癲升一浸，道指創新高後就嘔番一半升幅收市，納指同樣創盤中新高，但最終倒跌逾1%收市，完全係反高潮。其實疫苗能否量產，FDA批唔批准疫苗上市仍未肯定，美股隔晚盤前跟早段過度興奮，高位回吐係意料中事。另一方面，美國司法部長授權聯邦檢察官，就大選違規指控展開調查，市場擔心大選存變數，亞太區股市唔少都係高開低走。
至於港股連升三日進帳1130點後，今朝再創逾四個月高位後回順，半日升幅同樣縮水一半。恒指裂口高開457點，報26474創7月7日以來新高。開市後升幅收窄，臨近中午恒指低見26187，僅升171點，中午升186點，報26202。國企指數半日跌56點，報10576；恒生科技指數插4.7%，跌392點，險守八千關。
一個疫苗概念令資金輪動，由新經濟股轉軚去舊經濟股，不過阿Man唔係硬頸，而係疫情有疫苗可控，唔代表新經濟就此玩完。消費習慣，娛樂習慣跟工作模式顯然已因為疫情改變而返唔到轉頭，新經濟股急跌係因為累積升幅巨大，有獲利沽盤都好正常。實際上新經濟股啲股份前景跟錢景，都係睇高一線，雖然未知今日獲利沽盤沽完未，但以中長線計，阿Man都係鍾情新經濟股，跌落嚟就係一個上車好機會。至於邊幾隻股係首選，具分拆兼染藍概念嘅京東(09618)呢期會跑贏得罪阿爺嘅阿里(09988)；疫情緩和機友唔會停止打機，騰訊(00700)手游皇者地位不變，600元邊可以考慮；社交距離放寬一樣可以叫外賣，加上美團(03690)致力打造美團生活圈，300蚊邊嘅美團亦有得諗。
疫苗消息刺激旅遊出行股，航空股當然受惠，但幾時可以再呢度去，嗰度去，似乎今年都未必能夠出遊，短線刺激有機會係曇花一現，高追咪搞，寧錯過，莫買錯。反而疫情一向穩定嘅澳門，有機會放寬出入境限制，濠賭股升係有道理，只係呢個板塊只宜收集，不宜高追，連升多日後值博率減低，都係等回調吸納。
油價都算升得無乜道理，尤其拜登支持新能源，對於上面重重蟹貨嘅石油股，阿Man完全無興趣，話之今日三桶油急升。九置(01997)大升一成又係無厘頭，網購習慣改變已成事實，做零售要與時並進，結合線上線下銷售，未來零售業租用樓面面積只有少無多。其他傳統股雖見消資金追入，但唔少都高開低走出埋陰燭，食少多教訓，高追咪搞。
咪話阿Man唔提醒大家，雖然話新經濟股可以趁低吸納，但未知呢轉回吐幾時識停，有意趁低吸納長線投資新經濟股，都要學識分段上車，除咗上述幾隻重磅科技龍頭外。屬新能源汽車內地龍頭嘅比亞迪(01211)又係掂一掂10日線即彈，保持強勢，要博反彈梗係揀呢啲。
麥狄文
(徐狄怡‧證監會持牌人)
