熱門:

2020年10月30日 即巿股評 港股直擊

【盤房來料】小米完成收集再重新出發

隔晚美股反彈,道指結束連跌四日嘅慘況,而標指跟納指更升逾1%,但到亞洲時段道指期貨又跌過,拖累港股低開。恒指低開50點後,最多曾跌145點,見半日低位24441點。不過科技股又有買盤掃貨,令指數一度倒升13點,見半日高位24600點,但A股偏軟,港股再度回落。恒指中午報收245800點,微跌6點;國指中午報收9939點,跌16點;恒科技則升91點,報7767點跑贏大市。

重磅股個發展,大笨象(00005)跟中銀香港(02388)半日升0.5%及1.4%。石藥(01093)呢排藥過藥煲,股價繼續向下尋底,半日再跌2.8%,咁搞法下個月恒指季度檢討時,唔知會唔會被踢出恒指成份股。ATMX除咗阿里巴巴(09988)唔多精神,半日都係逆市上升,騰訊(00700)跟美團先跌後回升,美團早段曾跌逾3%,中午倒升0.5%。

小米(01810)今日好醒神,終於升穿阿Man叫收集範圍20至22元頂部,半日進賬5.3%,未知能否延續升勢重返24元水平。其他科技股普遍有進賬,阿Man最近加入長線組合名單嘅京東集團(09618),亦重上320元水平。不過比亞迪電子(00285)派完成績表腳軟,半日跌5.5%。

汽車股今日表現亦唔錯,阿Man一直睇好嘅新能源汽車龍頭比亞迪(01211)升勢有餘未盡,季績理想兼有大行唱好,調高目標價至200元過外,半日升3.3%,盤中平噚日所創新高。而其他汽車股亦有進賬,不過阿Man獨愛比亞迪,強勢股不妨吼位,見有調整至10日線附近可以上車。

除咗石藥之外,其實生化藥股板塊呢兩日唔精神,之前阿Man睇好嘅信達生物(01801)跟百濟神州(06160)半日下跌,圖表有啲走樣,但兩股基本面無變,可能係累積升幅較大,板塊表現唔好,有投資者唔想喺美國大選前持貨,自然揀啲手上仍有可觀盈利嘅股份套現。不過阿Man認為百濟神州呢啲位有得諗,今日落到171元低位,差不多補晒之前嘅上升裂口,只要守得住168元,百濟話唔定好快又調整完成再出發。

今日又到星期五,下周美國總統大選舉行投票,不明朗因素增加下,今日都唔好手多多買貨,寧作壁上觀,待大選結果定咗,再入場博殺亦未遲,幾時都係寧買貴,莫買錯。等美或總統選舉結束再入場,買貴少少唔緊要,最重要係唔好買錯。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads