美國新一輪刺激經濟方案仍未有着落，隔晚道指倒跌410點，納指更連跌5日，不過港股又唔係太受影響，暫時喺50日(24574)附近拉鋸。恒指今早高開29點報24571，開市後升勢不保，一度轉跌85點，見半日低位24456，但去到低位又見買盤趁吸納，大市止跌回升58點，見24600點半日高位。但大市始終受制50日線，恒指又再腳軟，最終恒指半日報收24520，跌21點；國指半日報收9986，升8點；恒科指半日報收7616，升45點。
重磅藍籌股個別發展，友邦(01299)微漲0.1%；大笨象(00005)繼續呆呆滯滯，至於近日係威係勢嘅內銀股，今日出現回吐，尤其國有銀行表現認真麻麻，阿Man對內銀股股一向唔多睇好，雖然近日唔少大行唱好，又話估值低好抵買，息差收窄問題有改善，又乜又物。好老實，內銀股整體基本面根本無改變，只係阿爺一句今年經濟復甦進度理想，內銀讓利方面唔需要做咁多，但實際上內銀股盈利表現如何，大家心中有數。內銀股呢幾日炒上，不過係為咗托住指數，阿Man認為有蟹貨喺手，好應該把握逃生機會。
上星期阿Man有提到，喺月底五中全會舉行前後，內需股有留意價值，皆因內循環谷經濟，仍然係呢兩年嘅經濟規劃主題，今早一眾內需股表現突出，而阿Man幾隻心水股包括一對體品股孖寶，安踏體育(02020)同李寧(02331)半日逆市上升，前者升3.2%，後者更創新高升近6%。蒙牛(02319)則3.5%，澳優(01717)阿Man未有推介過，但半日都升3.4%。
汽車股板塊亦各有代表，比亞迪(01211)半日升5.3%，中國汽車工業協會公布第三批新能源汽車下鄉嘅車企及車型名單，當中包括比亞迪。永達汽車(03669)半日急升12.3%，集團第三季財務數據表現出色，乘用車銷量按年增30.8%，至近5.9萬輛。股東應佔淨利潤4.8億元人民幣，按年升41.2%。睇嚟內地喺疫情緩和後，汽車呢樣消費品出現報復式消費。
炒股唔炒市都玩足兩季，到第四季呢個主調無改變，不過阿Man長氣都要提醒大家多一次，喺美國總統大選前後，股市表現將較為反覆及愈趨波動。其實邊個入主白宮對股市影響未必太大，反而係點票一旦出現爭拗，未能如期選出白宮新主人，將會為本來已唔明朗嘅情況更添陰霾。股市最忌不明朗，呢段時間都係保守啲好，至少都要減番一半倉位，另一半持有現金，待大選結果塵埃落定再加注亦未遲，緊記寧買貴，莫買錯。
麥狄文
(徐狄怡‧證監會持牌人)
