熱門:

2020年9月17日 即巿股評 港股直擊

【盤房來料】港股持續拉鋸 維持悶局

美國聯儲局議息一如預期維持息率不變,符合市場預期,同時表示維持近零利率政策至2023年,直至通脹回升。消息本來利好市場氣氛,但隔晚美股升勢不繼,尤其係科技股又再回軟,令市場憂慮科網股調整勢頭重現。而道指期貨更跌近300點,加上內地A股腳軟,滬深兩股市跌1%,港股半日跌至超過一星期低位。

恒指低開49點,早段跌幅曾縮至11點,見24713點半日高位,其後美股期貨跌幅擴大,A股又腳軟,恒指半日最多跌474點,見24250點半日低位,失守10日線(24555點)及100日線(24686點),為9月9日以來新低。恒指中午收報24327點,跌397點;國企指數報9716點,跌128點;恒生科技指數跑輸,半日跌近2%,報收7283點。

科技股又係重災區,主要股東配股減持後,小米(01810)都比較弱,半日跌近6%,報21.4元,不過董事長雷軍表示今年喺科研投入上超過100億元人民幣,係科創板所有上市公司研發成本總和一半,阿Man對小米前景有信心,有買貴,冇買錯,而20至22元係一個收集好價位。騰訊(00700)跟阿里(09988)半日跌逾2%,美團(03690)半日跌幅3.3%,又係要抖抖咁嘅款。

重磅藍籌股只有港鐵(00066)逆市升1.8%表現最標青,喺大市見近個幾星期低位同時,港鐵股價升至40.95元至本月高位,亦係今日表現最好藍籌股。友邦(01299)半日跌2.2%;大笨象(00005)持續走弱,半日跌2.2%,再創2008年海嘯後低位,股東當然無眼睇。創科(00669)創新高後今日回吐3.8%,藍籌股整體表現偏弱。

阿Man上周推介嘅比亞迪(01211)未有跟隨大市下跌,再創新高109.5元,半日升3.1%,花旗出咗報告大幅調高其目標價151元,睇到阿Man都有啲眼突,如果仍有貨喺手可以坐定定。至於其他汽車股個別發展,力世紀(00860)飆19%;廣汽(02238)則升2.8%;但獲多個大孖沙接配股貨嘅恒大汽車(00708)則跌2.7%,阿Man講明無本事贏到恒大系,都係做花生友算數。

暫時港股都係喺24000至25000點之間上落,一直依靠新經濟股帶動市場氣氛,但近日科技股回軟整固,港股又被傳統股拖低大市,而外圍股市有轉弱跡象,睇怕短期港股甚難向上突破25000關。至於下面支持位仍然喺23800至24000左右,都係悶局一場。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads