熱門:

2020年9月16日 即巿股評 港股直擊

【盤房來料】中資晶片企業技術落後N條街

隔晚美股表現反覆,三大指數個別發展,道指早段升逾200點,可惜收市前曾倒跌,最終力保不失微升2點。標指跟納指則分別升17點及133點。雖然iPhone12缺席於今次嘅蘋果產品發佈會,但市場早有心理準備,雖則話iPad 8th跟Apple Watch series 6等產品都係舊調重彈,但蘋果總有一批鐵粉忠粉,無論乜嘢情況都會追住新機入貨,果粉對於蘋果產品嘅熱情,係一般人難以理解。蘋果股價先升後回軟,但收市仍保持些少升幅。至於港股隔晚ADR及夜期隨美股做好,但今早日A股反覆偏軟,港股連彈三日後,今日高開低走。
恒指今早高開91點,甫開曾升97點,見半日高位24829點。其後A股走低,港股亦回吐,半日收市前曾跌76點,見24656點,稍穿100日線(24681)。恒指中午收報24672點,跌60點;國企指數報9824點,跌4點;科技指數跑贏大市,中午收報7416點,升67點,大市成交額549.13億元,又縮水,唔知今日收市過唔過千億。
重磅藍籌股都係咁上下,友邦(01299)跌1.5%,拖低大市;而恒安(01044)跟申洲(02313)先升後回,半日倒跌,申洲創新高後半日跌0.6%。不過平保(02318)今日除淨,半日升0.1%,港交所(00388)亦升1%;至於大笨象(00005)低處未算低,半日再跌0.6%。

美國科技股回勇,香港呢邊嘅科技股今日跑贏,不過升勢唔算全面,騰訊(00700)升0.8%;阿里巴巴(09988)升1.3%,只有小米(01810)仍然消化緊配股沽壓,半日微跌。蘋果第八代iPad由比亞迪電子(00285)有幸代工,半日創新高見43.7元,但中午升幅收窄至0.9%。華為遭美國制裁禁令生效,市場再度憧憬轉用國產晶片商,中芯(00981)升5.4%,為表現最好科指成份股;華虹半導體(01347)升半成。不過國產晶片技術跟世界級嘅最新技術差N咁多條街,要國產晶片完全替代外國貨,真係唔知中資晶片企業仲要用幾多時間去自主研發。同系比亞迪(01211)今早再創新高101.9元,不過紅底股身份一瞬即逝,阿Man上周提議喺80元附近上車,啱啱一個星期時間,輕輕鬆鬆升咗超過兩成,呢次推介有晒交代。

而甩咗B嘅信達生物(01801)今早創新高,集團喺9月19日至21日舉行的2020年歐洲腫瘤內科學會(ESMO)中,公布六項「達伯舒」嘅研究結果。另一隻甩咗B嘅百濟神洲(06160)日前亦公布,加拿大藥監部門已受理百悅澤(澤布替尼)用於治療華氏巨球蛋白血症(WM)患者嘅新藥上市申請(NDS)並將其納入優先審評。不過百濟今朝高開低走,但阿Man對百濟中線前景有信心,買咗貨唔跌穿143元都定啲嚟唔使太擔心,要追落後跟信達創新高指日可待。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads