美股隔晚顯著下跌，三大指數全部仆直，道指跌2.8%、標指跌3.4%，納指更跌近5%，個別重型科技股跌幅近接近一成，唔少缸邊友見到隔晚美股走勢，嚇到有得震，冇得瞓。其實美股呢兩個月累計升咗唔少，道指逼近歷史高位，標指跟納指亦已創新高，科技股嘅累計升幅更加驚人，調整亦好正常，實在唔需要大驚小怪。尤其隔晚美股下跌，未見有任何負面消息傳出，睇嚟都係技術上因超買而調整。再睇埋商品及貨幣市場，市場避險情緒亦未見增加，若然科技股及新經濟股前景仍然可以睇高一線，今次調整又係吸納優質科技股好機會。其實望返轉頭，隔晚美股嘅跌幅跟3月疫情剛全球大爆發時相比，絕對係小巫見大巫，加上美國嚟緊再會有新一輪刺激經濟方案，而多國疫苗研發進度理想，點計條數，依家都唔會差得過第一季，相信美股即使作較深度調整，3月多次熔斷嘅情況，唔會案件重演。
至於港股裂口低開338點，一度跌518點見24488點半日低位，其後跌幅曾收窄至310點，見24697點半日位，可惜100日線(24644)未能守穩，跌幅再度擴大至近500點。中午恒指報收24551點，跌456點；國指半日報收9809點，跌130點；科技指數半日跌3.4%，較早段跌5.4%大大收窄跌幅，中午報收7438點。30隻科指成份股早段全線下跌，但唔少人睇法跟阿Man一樣，吼科技股急跌趁低吸納，令科技股低位有支持，更有個別股份拗腰，早段曾跌逾一成嘅比亞迪電子(00285)，一度倒升，半日亦僅跌0.6%。京東(09618)之前升得急，回吐當然亦有返咁甘，股價半日跌近6%，係表現最差科指成份股。
今日收市後恒指服務公司將調整指數，三隻染藍新貴小米(01810)、阿里巴巴(09988)及藥明生物(02269)，半日跌1.9%、4.9%及3.4%；而有份駕入國指嘅美團(03690)半日則跌3%。京東(09618)半日跌5.9%，係表現最差恒科指成份股。其實將染藍重磅股，阿Man唔建議現價高追，有貨嘅坐定定，冇貨搵位追亦要識揀，甚至隨時做好跳車準備。
不過阿Man強調，無論美股跟港股，呢兩日不過係調整，尤其大市仍未跌穿24200至24500支持位，大市可以話仍然係區間上落。至於科技股及醫療生物股有回吐實屬正常，缸邊友無貨吼位上車，有貨嘅就搵個靚位上車。由於強勢股一般抖氣一兩日回勇，呢幾日落足眼力，睇住邊度會有大減價同大平價，今朝小米(01810)早段曾跌至22元低位，逼近10線水平，但其後走勢回勇，半日跌幅收窄至不足2%，有幸今早低位撈小米，下半場話唔定倒升有斬獲。
麥狄文
(徐狄怡‧證監會持牌人)
