白宮跟國會就新一輪刺激經濟方案可能快可達成共識，相關計劃金額高達1.5萬億美元，帶動美股隔晚全線做好，道指勁升454點，只差唔夠2%就到紀錄高位，標指跟納指則再創收市新高，可惜港股完全跟唔到，港股今日反覆偏軟，恒指盤中更一度失守25000 大關。恒指低開93點，開市後曾跌265點，見24854點半日低位，創8月20日以嚟低位。不過阿Man都話咗大市只係上落市格局，暫時唔見得會向上或向下有大突破，去到24800點支持位附近，大市又拗腰掉頭回升，最多升95點，見25216點半日高位，可惜喺20日線(25150點)同50日線(25149點)嘅滙聚區阻力再掉頭。半日恒指跌77點，報收25042點；國指微跌5點；恒生科技指數一度跌逾2%，半日收市報7788點，跌121點。
話咗傳統股冇運行，升市跟唔上，跌市行最先，大笨象(00005)半日跌0.6%、友邦(01299)亦跌0.4%，前者似乎低處未算低，阿Man講咗N次，死鍊唔放以為終有一日返家鄉，只會不斷見錢唔識執，唔去忍痛止蝕換馬，機會只有眼白白咁流走。港交所(00388)半日回吐1.1%，相對佢嘅累積升幅，回度幅度濕濕碎，有貨喺手繼續坐定定，只要上升形態未破壞，港交所就要死鍊住唔放手。
國際針對中國嘅制裁及封殺持續，印度電子和資訊技術部昨日宣布，再封殺118款中國App，重磅科技股借勢回吐。ATMX全部掉頭，騰訊(00700)跌1%、阿里(09988)跟美團(03690)跌2%及2.9%，小米(01810)亦回吐3.5%；京東(09618)跟網易(09999)分別跌2.7%及不足1%。不過二線科技股見資金流入，比亞迪電子(00285)跟阿Man推介過嘅祖龍娛樂(09990)創新高，祖龍下半年準備發行嘅新game鴻圖之下已取得批號，唔少機迷討論區都等緊呢隻game上市。祖龍早一兩星期，股價表現唔多精神，但阿Man堅持只要新game一出，祖龍定能向住首個目標價30元出發，有貨應該堅持坐定定，甚至低位再加碼，因為阿Man堅信『價值只會遲到，而永不會缺席』。
早兩日阿Man叫留意下周將被納入恒綜指嘅股份，其中海吉亞醫療(06078)大有機會被納入港股通，股價今日逆市創新高，一旦北水入場，海吉亞股價要『入五』應無難道。其實除咗海吉亞之外，康基醫療(09997)亦夠晒條件被納入港股通，只係呢間公司好奇怪，上市而嚟較為低調，亦唔見有大行cover，不過恒指服務公司已宣布八隻生物科技股唔會喺下周一加入互聯互通相關指數，變相北水少咗醫療及醫藥股選擇，本來冷門嘅康基醫療，今次或有望冷手執個熱煎堆。
圓通速遞(06123)獲阿里入股，股價噚日狂升2.6倍後，今日升勢持續，早段最多升72%，高見12.3元，不過半日升幅縮水至四成，阿Man選擇食花生，好消息宣布前無貨，股價兩日升幾倍，只有靠邊站做觀眾，唔通急升先嚟高追，無理由去接火捧。
