美股9月開局夠晒精彩，夾啱蘋果公司同Tesla兩重型股拆細熱炒，華爾街情緒仍然高漲，美股先低後高，三大指數以接近全日高位收市，標指跟納指再創收市新高。港股一直落後美股，以為人仔跟港滙指數走強，反映有資金續流入香港，但中港股市今早個別發展，可能資金流入跟近日將有大型新股招股有關，相關資金被IPO鎖住，未有流入股市。
恒指今日高開55點，報25239點見半日高位，開市後見沽壓，恒指即失20日線(約25142)及50日線(約25145)滙聚區，最多跌253點，見24931點半日低位，亦係8月21日以嚟低位，25000穿一穿後跌幅收窄，暫時險守25000關。恒指中午報收25045點，跌139點；國指則跌30點，報收9982點；恒生科技指數升154點，報收7829點創新高。
內銀股業績差，預咗呢個板塊陀衰家，建行(00939)跟工行(01398)齊齊跌逾2%，本地銀行股同樣受壓，大笨象(00005)跟恒生(00011)半日跌逾1%，友邦(01299)跌1.3%。不過要數表現最差藍籌為中聯通(00762)，半日跌3%。吉利(00175)回科技板上市申請，已獲上交所受理，半日升2.5%，留意吉利汽車回歸A股息早在預期內，技術走勢分析阻力位18元，有貨要識執生。
恒科指創新高，幾隻重磅成為股破頂創新高，阿里巴巴(09988)、京東(09618)及美團(03690)，現分別升2%、6.4%和3.7%。小米(01810) 早段亦創26.6元新高，但連升五個交易日，呢啲水平開始有獲利沽盤，畢竟由15元起步，不足兩星期小米已升咗十皮，技術指標又呈超買，呢啲時候抖抖好正常。騰訊(00700)半日升1.2%，但恒指下周一執位變動，雖然騰訊一哥地位不變，但其佔指數比重已超出10%上限，追蹤指數基金要減持，呢一輪科技股升浪，騰訊亦未能再創新高。反而今日二線科技股表現較佳，微盟(02013)創新高，半日升4.6%；不過阿Man呢期最關注仍然係等緊新game面市嘅半新股祖龍娛樂(09990)，半日升逾9%，差少少創新高。
國家主席習近平昨主持中央全面深化改革委員會第十五次會議，當中通過《關於規範民辦義務教育發展的實施意見》，市場又再憂慮加強教育行業的監管，而受影響較大係K12教育股，天立教育(01773)跌23%、 睿見(06068)插21.9%；楓葉教育(01317)跌18.8%，全部到走晒樣。
藥明生物(02269)喺染藍前又批股，今次係大股東減持，WuXi Biologics Holdings Ltd(WBH)以每股185元，配售3299.69萬股，套現61.04億元，配售價較昨收市折讓6.71%。其股價半日跌3%，但仍守喺配股價之上。藥明之前多次配股，無論係公司集資大股東減持，都無礙其升勢，估計今次亦唔例外，加上下周一起納入成份股，趁配股下跌執平貨，可能有意外收穫。
麥狄文
(徐狄怡‧證監會持牌人)
