隔晚美股個別發展，道指跌逾200點，標指亦見回吐，只有納指強勢依然，再創收市新高升逾百點。港股噚日喺8月最後一個交易日臨尾香，中午前傳出中印邊境再衝突，已令早段升幅窄水，午後再傳出內地官媒發文炮轟台灣，不滿有美軍偵察機於台灣當地起飛，重提武力統台。雖然武力統台講咗廿九幾年仍然係得個講字，但正好畀大市一個震盪藉口，恒指直插至全日低位收市，夜期跟ADR進一步下跌。
今早恒指低開91點，開市後曾跌181點，失守25000大關，見半日低位24995點。25000關失而復得，大市表現反覆倒升64點，全靠內地公布財新8月份中國製造業PMI報53.1，好過市場預期52.5，恒指見半日高位25242點。其後恒指於20日線(25145點)及50日線(25135點)滙聚區爭持。半日恒指收報51717點，跌5點；國指回升40點，重上萬關中午報收10031點；恒生科技指數則升115點，半日報收7659點。
藍籌股真係無乜睇頭，申洲(02313)半日升3.1%，業績後大行不約而同調高其目標價，內需概念股總有一定捧場客。百勝中國(09987)今日開始招股，國際配售部份聽聞半日已獲足額認購，不過由於上周五截飛嘅另一認購新股農夫山泉(09633)認購資金仍未回籠，而一般經紀行並未有為百勝額外預留孖展，暫時未見百勝IPO有熱烈反應，可能要等一兩日先見真章。百勝屬於第三日從美股回流第二上市中概股，聽聞阿里有份投資嘅中通快遞亦會短期內回歸港股。而螞蟻集團亦鐵定A+H同步上市，咁多重磅中科企跟中概念排住隊嚟香港上市，難怪港交所(00388)股價沒有最高，只有更高。
美國科技股強勢，香港呢邊嘅科技股就個別發展，藍籌新貴小米(01810)連升五日，上半場再升6%兼再創新高，阿Man就坐定定let the profit run，升得好哋哋嘅股份，係唔使急住落車嘅。同樣要染藍嘅阿里巴巴(09988)上半場跌0.4%，始終有美股BABA拖住，阿里股價上落當然無咁隨心所欲。美團(03690)跟騰訊(00700)噚日散場前忽然見大型沽盤殺到，拖累兩股收市前急回，今日雙雙反彈，ATMX都係長線要坐到實嘅股份，股價失驚無神急跌，反而係博懞買平貨好機會。
至於噚日下半場拖累大市急挫嘅內銀股，今日仍未識反彈，八隻內銀股齊齊跌至今年內新低，只有噚日跌得最甘嘅郵儲行(01658)半日反彈1.1%。全球電動車第一股Tesla拆細後。，股價狂升，內地電動車龍頭比亞迪(01211)半日升一成，走勢喺成交增加配合下突破，睇嚟呢次大有機會升穿前高位90元水平。
麥狄文
(徐狄怡‧證監會持牌人)
