隔晚美股個別發展，納指有回吐，但聯儲局一改已沿用多年嘅舊有政策，改為以平均通脹作為框架，望通脹喺一段時間內「平均」增長2%，以及考慮失業率採取更寬鬆立場，變相低息環境將維持一段較長時間，道指跟標指上升，標指更再創收市新高。
至於港股今日反彈，主要係因為再有資金流入，金管局近日接貨接到手軟，港元匯價多次觸及強方兌換保證。恒指高開49點報25330，一度轉跌22點，見半日低位25258點，但低位有買盤吸納，大市掉頭回升，恒指更重上10日線(25312點)，半日最多升284點，見25565高位。恒指中午收報25500點，升218點；國企指數報10277點，升25點；恒生科技指數半日收報7637點，升96點。
今日首隻跟恒生科指ETF掛牌，南方恒生科技(03033)上市起始價約7.5元，但竟然唔知邊條傻佬以20元U盤競價買入，九點半開市後即打回原形，重返起始價附近，中午隨恒科指上升報收7.8元。而交投都算幾暢旺，半日成交已超過20億元。口痕友話U盤高價買入呢隻ETF，係咪誤會咗當新股咁炒，升一兩倍好平常，所以擺咗個大烏龍。如果讀者跟得阿Man有一段日子，都知道阿Man無推介過指數ETF，原因係睇好睇淡指數，阿Man認為炒期指最公道，而反向ETF適宜短炒唔啱長坐，至於追綜現貨指數ETF係就係可以長坐，但阿Man認為睇好指數即係睇好大市，咁總有個股跑贏指數，倒不如集中火力買個股坐好過。道理好簡單，今年新經濟股炒得火熱，上升超過一倍嘅股份比比皆是，而且要有咁嘅升幅，都未必要好長時間，唔少科技股由今年初至今都升咗一倍，講緊都係幾個月嘅事，誇張啲好似中芯(00981)呢一類，升一倍不過用咗一個月鬆的時間。相反指數要倍升，講緊要以年計，三五七年都唔出奇，邊有好似納指咁罕有，喺3月低位最唔夠半年時間累計升近一倍。
講到個股呢期表現最強勁，當然要數阿Man由15元左右大力推介嘅小米(01810)，之前睇中小米純粹係睇好佢今年可染藍，結果如願以償，下月7日起正式被納入恒指成份股。但前日小米派咗中期成績表後，阿Man對小米完全改觀，變身藍籌都唔係重點，業績超預期之外，其IoT業務發展理想，商業模式成功，公司成功由單純手機股，進步到真正科技股，雖然呢幾日股價急升，但中金最新發表報告，將佢嘅目標價調高至30元，對應2021年市盈率41倍，即係話股價喺呢兩個星期由十五六蚊急升到呢啲位，明年預測市盈率都仲未夠40倍，以科技股嚟講係平到笑，所以北水瘋狂掃貨係有理由。
麥狄文
(徐狄怡‧證監會持牌人)
