熱門:

2020年8月14日 即巿股評 港股直擊

【盤房來料】恒指季檢前 缸邊友按兵不動

隔晚美股無乜大動作,市場等待周末中美雙方有關貿易談判舉行嘅視像會議,雖然都預咗雙方唔會達成乜嘢新協議,但至少喺近日中美關係漸趨惡化嘅時候,唔好傾到反枱,不歡而散,咁美股應無乜大礙。雖然納指已由屢創新高,而標指亦已逼近今年2月高位,但最近一次業績期嘅標指成份股企業盈利表現理想,超過八成嘅公司季度業績都好過市場預期。

至於港股連升兩個交易日,進帳逾800點後,隔晚夜期跟ADR要回氣抖抖,而今早內地公布嘅經濟數據表現參差,一度拖累大市跌近200點。恒指低開158點,但A股因工業消費數據差過預期腳軟,拖累港股跌幅擴大至190點,見半日低位25040。不過25000都守得幾穩,曾倒升49點,見25280半日高位。恒指半日收報25183點,跌46點;國企指數收報10270,升25點;恒生科技指數升8點,半日收報7039點。大市成交547.5億元,較上日縮水,除咗周末效應,市場亦觀望收市後,恒指服務公司公布季度檢討結果,缸邊友按兵不動。

重磅藍籌股個別發展,騰訊(00700)業績雖好,但股價無力,主要係預期恒指成份股季度檢討後,無論有如何變化,騰訊喺目前比重超過10%上限嘅情況下,點都要減磅。大笨象(00005)威得嗰一陣,今日股價又重返40元樓下,半日跌1.4%。太古A(00019)係表現最差藍籌,半日跌2.3%,受國泰(00293)拖累,公司勁蝕77億,咁都算跌得少。至於銀娛(00027)派完中期成績表,獲大行調高目標價,半日微升0.3%,不過呢啲位追貨略嫌有啲貴,即使下個月澳門放寬入境,亦唔等於博彩收入可以回復疫情前水平,阿Man認為濠賭股低吸可以,高追真係咪預我。

三部紅色電話急升後,今日仲企得穩高位,下周二派成績表嘅 中電信(00728),半日再升6.2%,睇嚟春江鴨對其業績充滿信心。而噚日爆升兩成幾嘅聯通(00762),半日再升近1%,真係估佢唔到。中移動(00941)則微跌0.1%。
物管股又再落鑊,恒大(03333)分拆旗下物管業務上市,引入多名戰略投資者,帶動整個板塊落鑊。碧桂園服務(06098)再創新高,其他物管股普遍升超過1%。之前阿Man推介過嘅李寧(02331)公布半年純利跌14%,但公司已捱過疫情後最差時間,股價半日反而再升逾8%創新高。上月推介李寧時股價約26元,目標30元已超額完成,不過穿頂唔估頂,有貨可持有,可以用番31元作止賺參考。

內地力推內循環,除咗李寧呢類消費股,阿Man建議可留意高鑫零售(06808),今早股價高開後,無厘頭跌至10.76元低位,原因係大摩報告調高其目標價至10.5元後,現價仍然高出一截。講真大摩嘅魔笛追魂早已有前科,喺其他大行平均目標價14元以上嘅情況下,阿Man覺得呢啲位博得過,11.5元樓下上車,穿10.5元止蝕,用1元博升穿前高位13.4元再創新高14至15元,計落有着數。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads