熱門:

2020年8月11日 即巿股評 港股直擊

【盤房來料】傳媒股瘋炒無膽入場 只能食花生做觀眾

唔覺唔覺道指跟標指隔晚已連升第七個交易日,不過納指有啲腳軟,但低位又有買盤趁低吸納,又唔算跌好多。由於侵侵喺周末已簽署行政命令繼續「派糖」,加上美國每日新增確診數字有下降趨勢,資金流入傳統股,反而已累積唔少升幅嘅科技股同新經濟股要回氣。而噚日表現麻麻嘅港股,喺連跌三個交易日後,今日終見反彈,逼近二萬五大關。

恒指高開284點報24662,已經係半日低位,開市即發力,順利升穿10日線(約24749)後升幅持續擴大。恒指盤中最多升607點,報24985,進一步升穿20日及50日線滙聚區(約24900)。恒指中午報24962,升585點;國指則升226點重上萬點大關,半日報收10217點。恒生科技指數今日反彈,不過彈力只係一般,半日報收7199點,升23點。

阿Man認為市場對於騰訊(00700)旗下微信遭美國封殺呢件事有啲反應過敏,上周五股價急跌至接近50日線,阿Man 當日上午已指示一班鐵粉會員要掃貨,結果當日午後股價一度反彈至530元水平,周末前呢個即食快餐都咪話唔滋味。反而騰訊喺噚日再插5%後,今日反彈力水麻麻,連535元10日及20日線匯聚區都上唔返,可能係等埋明日集團派中期成績表。加上周五恒指服務公司季檢,過晒磅嘅騰訊,今次或要減一減磅瘦身,呢期難免有啲沽壓,不過對於長線投資者嚟講,反而係一個上車好機會。建議吼位喺515樓下開始分段買入,若然股價喺呢段時間再逼近50日線,即500元水平,大大力掃落去冇有怕。

其他重磅藍籌股今日普遍向上,否則恒指亦難錄得逾500點升幅,只有中生製藥(01177)斯人獨憔悴,公司派發完紅股反而遭股東捨棄,唔似得之前藥明康德(02359)發完紅股愈炒愈起勁,都算係同類股份唔同命運。

澳門社會文化司司長歐陽瑜宣布,特區政府接獲國務院港澳辦通知,8月12日起,將恢復珠海居民赴澳旅遊簽注,包括個人遊跟團隊遊。濠賭股全線做好,普遍升幅超過4%。不過阿Man認為喺中美關係仍然緊張下,要涉足呢個板塊,避開外資有份參與嘅公司,即係要買濠賭股,揀番銀娛(00027)、澳博(00880)同新濠(00200)呢啲自己中公司穩陣。

噚日有本地傳媒機構遭執法人員搜查,更拘捕壹傳媒(00282)高層及老闆,不過壹傳媒股價不跌反升,連帶其他傳媒股亦落鑊熱炒。今日呢個板塊愈炒愈起勁,只係阿Man一向細膽,自問心口無掛住個勇字,都係靠邊站食花生做觀眾。皆因本地傳媒經營環境愈見困難,各印刷版報章出紙愈來愈少,亦唔多覺好似以前咁廣告一大堆,行業一直處於下行行情,阿Man實在無法說服自己拎起支鑊剷衝入場。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads