熱門:

2020年8月3日 即巿股評 港股直擊

【盤房來料】大市有機下試23800至24000找支持

港股今日走勢明顯轉弱,上周五美股做好,但港股ADR及夜期完全跟唔上,已預示港股8月開局走弱。雖然今早公布的財新7月份中國製造業PMI報52.8,好過市場預期,A股走高,但港股仍然斯人獨憔悴,跑輸外圍,上半場更見超過一個月低位。

恒指低開28點,早點曾倒升51點,見半日高位24647點,但50日線(24680)未能收復,即掉頭向下,最多跌344點,見24250點,跌至自6月底以嚟新低。恒指中午報收24362點,跌233點;國指跌65點,報收9974點。半日成交717億元,略見增加。

大笨象(00005)中午派上半年成績表,列帳基準稅前盈利按年倒退65.19%,至43.18億美元,遠遜於市場預期中位數56.89億美元。上半場股價已跌近2%,睇嚟下半場跌幅或擴大。同系恒生(00011) 上半年純利91.43億港元,按年跌33.04%,第二次中期息每股0.8元,上半年每股派息1.9元,按年減少32%。不過有息派點都好過大笨象無息派,又無回購,不過無論係本地銀行或本地地產股,下半年都係繼續無運行。今日半地地產股再捱沽,當中恒隆(00101)跌近4%。本月中恒指季檢,恒隆好大機會被踢出藍籌成份股,當然呢個係阿Man推測,但以市值及每日平均成交計算,恒隆出局機會都幾大。有時真係唔到你唔信邪,藍燈籠中移動(00941)半日升近1%,次次藍燈籠一升,個市就反方向行,完全係升市剋星。

濠賭股遇咗無運行,之前反彈阿Man千叮萬囑咪追貨,澳門博彩監察協調局公布,7月博彩收入僅13.44億澳門元,按年下挫94.5%。話咗澳門就算放寛入境限制,都唔等於會有大量賭客入場。疫情影響下基層連搵兩餐都成問題,而一眾老闆則吊晒鹽水,有啲連鹽水都無得吊,關門大吉,仲邊有咁多閒錢去賭場玩兩手。濠賭股全面受壓,跌幅由0.7%至2.7%不等。

內地為咗維持經濟免陷入衰退,基建一向係國策支持嘅行業,中國水泥價格上月底顯示熟料價格通知上調20元人民幣/噸,水泥板塊逆市上升,中建材(03323)創超過七年高位,半日升逾4%。內地豬肉價格亦向上,相關豬肉股逆市上升,中糧肉食(01610)更創新高,半日升4.2%。

科網股今日個別發展,上周阿Man推介嘅祖龍娛樂(09990)逆市創上市新高,雖然蘋果公司周六從中國應用商店下架超過3萬個App,其中90%為遊戲類,但對祖龍毫無影響。主要係被下架嘅遊戲app,全為未獲官方認證無批號嘅遊戲,而祖龍旗下遊戲全部攞正牌,蘋果公司呢個舉動,反而對祖龍有利無害。

留意恒指100日線(約24263)一旦失守,好大機會下試23800至24000點,呢個位剛好係上月初見26782高位後,回吐至24766點約2000點,反彈至25779約1000點,以25779點回落2000點計算,剛好係23800水平左右。而由21139延伸至26782點反彈浪回吐黃金比0.5計,為23961點,同樣喺23800至24000點範圍內。預期8月初段港股表現較為疲弱,如能夠成功喺23800至24000搵到支持,咁月中大市有望回升。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads