今日搭遲咗一班巴士返工,返到嚟開埋機,沖好茶都已經9點55分,是但啦,no one care,我有返工咪得囉。
經過恒指噚日升逾400點再倒跌逾300點收市,來回波幅逾800點之後,今朝恒指開市升103點,報26078點;依家9點58分,恒指高開完之後已經出現倒跌,現價報25949點,跌26點,回返落去250天線(26081點)之下,同步日線圖見SlowSTC(14,3)%K線跌穿%D線,看淡訊號已經發出。一個唔該如果今日粒燭嘅燭身生到同星期一(7月6日)嗰支咁上下大嘅話,高位「黃昏之星」即時誕生,亦配合咗噚日定前日睇嗰幅「超買中的週線圖」,咁樣玩法,落返去10天線(25172點)都唔出奇。
睇埋恒指牛熊證街貨圖,應該都係恒指升得高又急,資金好淡倉都見有增加,牛熊兩邊貼價街貨層都見到有過千張期指進駐。先睇牛證,再追升嘅都真係唔講得少,喺24900至24999點呢度有相當於1025張期指駐守,呢度已經係最貼價牛證,同現價(10點7分見25987點)計,都有差不多成千點差距;至於熊證最貼價層為26700至26799點,呢度只有205張期指嘅街貨,但上多100點嘅話,即26800至26899點,就有成1244張期指喺度,明顯係見大市累升咁多,係時候要掉頭向下,所以先至有咁大批貨喺度。同樣以頭先mark低恒指嘅價去計嘅話,呢層同熊證首層街貨有逾700點差距,比起牛證嘅過千點當然近啦,但700點呢個差距,話多唔多,話少唔少。
「恒指依家走出嚟個樣似係下行咁款,反正現價同牛/熊最貼價層嘅差距都係咁遠,咁向下殺牛證都好合理呀!」雖然開市到依家只係45分鐘到,但係如果話要個市推咁大嘅點數向一個方向殺牛/熊嘅話,咁倒不如先吽住個市,這邊廂借市場有更多新嘅又貼價啲嘅證上市之後,將牛/熊街貨差距拉近;同時喺那邊廂有更多資金流入,繼續落盤買大細,當儲夠一定數量嘅貨,而貼價層又真係夠貼價嘅話,先至再決定向邊個方向衝都未遲。
呢個時候就最好八掛下一啲個股,噚日喺[下半part]八掛咗隻港交所(00388),三款線圖都見「超買」,依家就係要等佢冷靜啲先可以再部署。再搵到嘅係隻友邦(01299),有一段時間都忘記咗佢。
友邦噚日隨大市上揚,升穿250天線以上水平,但後來亦不敵尾市下行,如是者一支大陰燭就咁插咗喺嗰頂,今日暫呈接近「十字星」嘅樣(一日未收市,一日都未可以確定),但以依家呢個樣,你話佢似「黃昏之星」佢又未係100%好係,「上升軌」又仲喺度,拉線度就見到似一浪高於一浪形態上行中,只係目前處於準備完成第四個浪嘅下行階段。
可以將友邦放住入watch list度先,唔好咁心急住,反正開5分鐘圖都未見有靚位。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
電郵:[email protected];FB:輪證贏家