熱門:

2020年6月24日 即巿股評 港股直擊

【盤房來料】科技醫療股強勢繼續吸金

美股隔晚再升,納指更連升八個交易日,更再創收市新高,大型科技股蘋果公司、Facebook、亞馬遜、微軟齊創收市新高,帶動騰訊(00700)順利升抵500元大關,變身大牛股。恒指今高開127點,重返25000關,盤中一度升163點,見25071點半日高位,半日最多倒跌44點,見半日低位24862點。中午恒指報收24921點,升13點;國指則報收10003點,升9點。

騰訊創505元新高後見回吐,半日報收500元,都係嗰句,升到穿晒頂嘅股票,唔好問幾時落車,落唔落車呢啲愚蠢問題,要食糊幾時都可以,長線睇好,不妨部份短線操作,一部份長坐,短炒部份自然可以減低坐貨成本。

其他重磅股個別發展,阿Man一直睇死嘅內銀股,就係死到直一直,恒指都上番二萬五水平,呢個板塊就係呆呆滯滯。講真打從2015年內地股市發生熔斷,出現一大堆殭屍股以後,內銀已侷住債轉股,今年遇上疫情令經濟有機陷入衰退,阿爺已下令內銀要讓利,支撐經濟,咁嘅情況下,內銀又點會有運行。阿Man一直強調要貪新忘舊,捨棄舊經濟股,擁抱新經濟股,並唔係隨便講講。除咗內銀股,大笨象(00005)同樣長期跑輸大市,今年仲要零回購,唔派息,更加連嗰少少利用價值都失去,睇嚟大市即管再上,大笨象亦未必能重返40元樓上。

新經濟股繼續開開心心炒落去,除咗騰訊創新高,美團(03690)、網易(09999)跟金蝶(00268)齊齊破頂。心動公司(02400)折讓近一成配股,股價半日跌8.3%,值得一提係抽水潮持續,但批股完唔死得嘅股,反而值得留意。ATMX齊齊向上,小米(01810)眼見蘋果公司喺美國屢創新高,小米亦發奮追落後,不過提提大家,小米14元樓上阻力大,蟹貨重,冇貨高追要小心。除咗小米之外,手設股舜宇(02382)跟瑞聲(02018)分別升3.9%及4.8%。

醫藥股亦繼續有資金追捧,石藥(01093)半日升半成,中生製藥(01177)創新高後整固,中午無起跌,但阿Man有信心,中生製藥破頂後仍有follow,以估值計算,中生製藥仍有空間調升,加上送紅股可支撐股價,中生製藥好趁整固上車。微創醫療(00853)批完股仲企定定,今日再破頂,半日升近13%,又係穿頂唔估頂,之前藥明生物(02269)批股後喪升,就係一個好例字。至於長江生科(00775) 公布旗下seviprotimut-L獲美國食品藥物管理局批准快速通道資格認定,股價急升,但長江生科次次都係消息公布完急升就無影,高追小心有伏。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads