美股隔晚表現反覆,三大指數個別發展,納指繼續跑贏。不過G7聯署促請中國停止港區國安立去,國安法事件發酵,幸而中美外交高層會面進行「建設性的對話」,令恒指低位拗腰。港股先低後回升,跌幅大大收窄。恒指低開59點,跌幅一度擴大至359點,見過半日低位24121點。其後跌幅收窄至只有38點,見過半日高位24443點。恒指中午報收24427點,跌53點;國指半日跌2點,半日報收9906點。
中美雙方喺夏威夷會面舉行對話,雙方同意採取行動,認真落實兩國元首達成嘅共識,並同意將繼續保持接觸跟溝通。呢個消息支持港股低開後回彈,目前港股仍然處於上落市格局。
藍籌股以金融股表現最差,大笨象(00005)恢復裁員計劃,打算喺中期內裁減約3.5萬個職位,半日跌1.7%;其他內銀及內險股表現亦較為疲弱。其他藍籌股個別發展,今日地產股有啲反彈。
京東(09168)今日掛牌,同網易(09999)命運一樣,一高開5.8%報239元已經係半日高位,中午升幅收窄至3.8%,報234.6元。唔少缸邊友都蠢蠢欲動想撈京東或網易,睇嚟暫時未係應該入貨嘅時候,有心買貨作長線投資唔使急,分注買入較為炙妥當。其他科網股抖氣嘅抖氣,創新高嘅再創新高,金蝶(00268)創新高,阿Man見中國軟件(00354)落後咁多條街,剛好今日喺成交配合下突破100日線,只要企穩4.5元樓上,應該有機會再向住5元推進。金山軟件(03888)亦不甘示弱,連日回升已逼近前高位,一旦升破32元就進入無障礙通道,即管畀多少少耐性,要破新高指日可待。
美國似要放生華為,暫時喺風口刀尖上嘅中興通訊(00763) 納米晶片已實現大量生產,股價今日再升近一成,但衝破25元後要企穩唔容易,如果搞得掂,暫時可以再睇到28元。呢期都係炒股唔炒市,新經濟股仍然係焦點所在,醫藥股亦步亦趨,資金仍然留戀,抓住呢兩個板塊,荷包應可愈來愈腫脹。
麥狄文
(徐狄怡‧證監會持牌人)