美股連升多日後斷纜,不過科技股強勢,納指再創新高,今日港股亦由新經濟股帶動,今早創三個月高位,挑戰八連升。恒指今早高開121點,一度升246點,見25303點半日新高,亦創自3月11日以嚟高位,不過100日線(25106)未企得穩,大市又急急腳回頭,一度倒跌88點,見24968點半日低位,其後重上25000點,喺呢個水平爭持。恒指中午報收25082點,升25點;國指則報收10151點,升29點。
藍籌重磅股方面,藍燈籠中移動(00941)繼續升多1.2%,暫時仲未燈死個市。但大笨象(00005)逆市跌1.1%,唔知係咪米字旗國有聲意批評大笨象同渣打(02888)跪低,搞到啲人對佢對印象再差啲。不過友邦(01299)同樣跌近1%,兩隻指數重磅股搞到個市企唔穩25200點,阿Man捨棄傳統股係有原因,皆因經常累街坊,升又冇乜力,跌市時又樣衰過人。
網易(09999)明日掛牌,接住仲有京東(09618),仲有拼多多,仲有…….中概股排住隊嚟香港上市,港交所(00388)獨市生意唔憂做,股價穿頂唔股頂,有貨放心坐,讓子彈繼續飛。
人家美股唔少科網巨企創新高,香港呢邊炒咗幾日傳統股,慢吞吞兼動力有限,資金再次流入抖咗幾日嘅科網股。手遊大哥大網易明日登場,其他手遊股當然要贈興,今日呢個板塊普遍做好。不過阿Man都係鍾情龍頭中嘅龍頭騰訊(00700),抖咗幾日今日終於再發力升2.3%,順利突破440元阻力,只要企定定喺440元上面,阻力變支持,再加埋細摩噚日又出報告吹奏,目標價調高至600元,呢轉應該要睇番年初高位,即係470元。美團(03690)跟阿里巴巴(09988)分別升3%及1.6%,ATM呢個鐵三角,真係一個都不能少。
國泰(00293)宣布進行390億元資本重組計劃,政府出手打救,係咪大到不能倒唔敢講,但司長話國泰唔救唔得,因為國泰存亡,直接影響香港國際運輸樞紐地位,兼且要減低關鍵行業系統性風險,無得唔救咁話。無論如何,國泰得到政府出手相助,財困問題暫時解決,希望疫情盡快過去,又或者係疫苗早日面世,全球航空業重回正軌。不過中國民航局公布,5月旅客運輸量按年大跌逾五成,南方航空(01055)挫3.4%;東方航空(00670)挫2.8%。其他航空股方面,中飛租賃(01848)跌1.5%;中銀航空租賃(02588)跌2.1%;首都機場(00694)降1.2%。航空業要復甦仲有漫漫長路,但至少最壞時候應該捱過咗。
噚日睇中隻永達汽車(03669)諗住博破頂,誰知公司忽然宣布配股,配股價仲要較噚日收市價折讓7.4%,不過今日大摩加持,指公司配股集資有助擴充銷售網絡,而預期6月寶馬銷量驚人,再加埋公司已計劃派發特別股息,目標價調高至12元。永達今早股價低開後回穩,半日跌幅收窄至不足3%,只要企得穩喺配股價之上,仲要守埋8.5元,後市再挑戰高位機會大。
麥狄文
(徐狄怡‧證監會持牌人)