熱門:

2020年5月25日 即巿股評 港股直擊

【盤房來料】港交所有中概股回歸護身符 可逢低吸納

上周四兩會開幕時,阿爺向香港送大禮,決定將「港版國安法」納入人大議程,納得入議程都唔使諗一定通過,呢個消息一出,等於間接宣布一國兩制已死。香港引入「港版國安法」,美國已表示將強烈回應中方呢個措施,市場關注香港局勢及美中關係合否惡化,最壞打算係美國取消香港獨立關稅區地位,咁香港就真係窩可。

港股經過上周五急挫逾千三點後,今早恒指繼續低開,早段恒指曾跌410點,見兩固月低位22519點。其後A股倒升,帶動恒指拗腰倒升38點,見過半日高位22968點。可惜之前23000點支持喺上周五秒失後,變成阻力位。半日恒指報收22701點,跌228點;國指則報收9383點,跌42點。

藍籌股普遍下跌,尤其本地股份跌幅較為顯著,大笨象(00005)跟恒生(00011)呢兩間本地最大銀行,分別跌1.5%及4.1%,大笨象已回落至2008年金融海嘯時水平,都咪話唔悲哀。除咗本地銀行股之外,本地地產股亦跌得相當甘,即使周末期間有發產商新盤銷售成績理想,但本地地產股仍未止跌。而本地零售股同樣走弱,以為疫情緩和零售業可以有番啲起色,但「港版國安法」再次引起社會動盪,零售業雪上加霜。

至於醫藥股則個別發展,B股龍頭康希諾生物(06185)重組新型冠狀病毒疫苗I期臨床試驗結果顯示接種後28天可耐受,並具有免疫原性,股價曾升8.1%,之後掉頭急插,半日插近兩成。不過上周阿Man推介剛上市嘅沛嘉醫療(09996)同埋之前推介嘅維亞生物(01873)則逆市上升,前者上市冇耐,街貨唔算多,沽到咁上下沽盤消化得七七八八,就算唔炒上亦可以定落嚟。至於維亞講到明街貨有限,貨源歸邊,股價容易舞高弄低,加上有大行唱好,要反彈亦易過借火。

阿Man一直睇好嘅港交所(00388)有中概股回歸呢度護身符,早段跌過去255元半日低位後即見買盤湧入,始終中概股排住隊嚟上市,港交所生意唔憂做,係呢段時間最放心逢低吸納嘅藍籌股。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads