期待已久嘅報復式反彈,終於隔晚喺美股出現,道指狂升2112點,升幅超過11%,為1933年以嚟最大單日升幅,標指跟納指亦分別錄得9及7%升幅。全靠美國國會終於就2萬億元救市方案接近達成共識,加上聯儲局QE,無上限買債,而道指跌近萬八水平,已較高位回落近四成,嚴重超賣下反彈亦好正常。港股繼噚日反彈後,今日反彈持續,但逼近23500水平見阻力,回吐一下至23000水平上面整固一下,反彈先有條件繼續反彈之路。
恒指高開592點後,重返10日線(22903點)後,升幅一度擴大至825點,見23488點半日高位。其後升勢回順,升幅收窄至412點,見23076點半日低位後,暫時守於23000水平。恒指中午報收23143點,升479點;國指升191點,報收9375點。
重磅股個別發展,龍頭騰訊(00700)一如所料升抵375元,早段曾見381.6元,375至380係初步反彈阻力,早兩日已講咗,暫時只要騰訊守喺372元樓上,反彈仍有機會再向上挑戰388元,至於能否重上340元,目前言之尚早。另一重磅股友邦(01299)半日反彈逾5%,表現唔錯,不過要重上70元水平,似乎仲未夠動力。至於大笨象(00005)都算樣衰,反彈乏力,半日最高見46.35元,但中午仍要倒跌,叫做險守45元,話咗博反彈揀新經濟股,傳統股經過呢一輪跌浪,即使跌勢止住,亦只會喺低位橫行,反彈力度有限。中移動(00941)係表現最差藍籌,半日跌1.5%。
疫情影響下,航空股首當其衝,人哋美國航空股就話有政府撐腰,但香港同內地嘅航空企業唔知有冇咁嘅福氣,但之前跌得太殘自然跟番個市反彈。整個板塊閒閒地彈超過4%,就連飛機租賃業務嘅相關股份亦借機反彈。
值得一提係油價反彈帶動石油股齊齊彈,不過阿Man一向對石油股都無乜好感,加上就算美國同OPEC就算達成協議,油價都只係止住跌勢反彈,好難講會大翻身,都係嗰句,石桶油反彈佢嘅事,我就一於當睇佢唔倒。
麥狄文
(徐狄怡‧證監會持牌人)