熱門:

2020年2月27日 即巿股評 港股直擊

【輪證贏家】等STC超賣回升

喺第22日Home Office,乜得一早起身個天就濕濕淋淋咁架?最怕就係呢啲天氣,搞到個人都無乜精神咁。

個市就唔駛多講,肯定都係繼續陰天,今朝低開過百點後,依家10點30分,跌幅多咗,依家做緊26465點,跌230點。日線圖上今日大市暫呈實心陰燭,此前畫過、由上年8月中到依家嘅「中期上升通道」早兩日跌穿後,今日都未見有爬返入去嘅跡象,不過,苦候多時嘅SlowSTC(14,3)已經落到嚴重超賣水平,%K線始有少少兜底嘅走勢。

觀乎噚日同今日恒指暫時做出嚟個樣,一旦聽日SlowSTC(14,3)確認出現低位回升,明日彈支陽燭出嚟,呢三粒夾埋有機會會形成「早晨之星」,喺陰陽燭圖分析上,係一個見低回升嘅利好形態。

呢啲都只係純綷個人FF啫,事關按目前牛熊證街貨圖嚟睇的話,雖然今日牛熊兩邊都無新增街貨,但以目前恒指點數計,仍然都係靠近牛證街貨區,且按截至10點46分止,恒指最低做過26419點計,牛證第一層街貨26400至26499點都幾乎被殺得八八九九,而呢層有相當於626張期指。

話就話今日期結,但似乎都仲未有誘因令大市轉跌為升,睇嚟都真係要靠SlowSTC(14,3)確認回升先至有希望;當然,如果熊證街貨有新證上市,且收回價可以再低啲(起碼落到27000至27099點呀),大市反彈向上咬,都咬得大啖啲。

安全策略計,依家就只有一個字:「等」。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads