熱門:

2020年2月20日 即巿股評 港股直擊

【輪證贏家】吉利現鐘擺

早晨,今日係第17日home office,連鑽石公主號上嘅港人乘客都可以安全返港,我都希望下個星期可以安全返公司。

噚日無做過任何推介,不過就見到恒指日線圖DMI嘅ADX出現明顯下行,再加上恒指波幅指數(VHSI)有超賣回升嘅跡象,兼且噚日恒指企喺牛熊街貨嘅中間位,喺無明確方向之下,買包花生就算。

今日見恒指開市時雖然係上行,不過到依家10點17分,恒指已經出現倒跌,至跌78點,做緊27576點,最高暫見27767點,同50天線(27762點)差不多水平,但可惜大市無力再上,結果日線圖上暫呈大市被50天線頂住上唔到。仍然可幸嘅係恒指現水平仍處於20天線/保歷加通道中軸(27388點)之上;同步見保歷加通道口亦收窄中,暗示大市上/下方向走動嘅空間又進一步收窄。

DMI嘅ADX到今日仍然下行中,但再睇埋VHSI,見日線圖上SlowSTC(14,3)%K線低位回升,並且升穿%D線,技術上VHSI仲有50天線(16.94)作為支持。

既然預視大市或有大波幅即將殺到,惜殺上定殺下仍然係未知之數。今日再睇恒指牛熊證街貨圖,牛熊兩邊都無新增街貨,而一如噚日所料,大市噚日上行,結果引嚟嘅係更多資金入近熊,甚至沽牛入熊作反手出擊,熊證最貼價層27700至27799點有相當於542張期指,當中有297張係噚日新增;反觀牛證最貼價層27400至27499點,有相當於168張期指,對比噚日嘅減少589張。

喺10點33分時見恒指跌幅擴大至135點,報27520點,呢個位置靠近牛證街貨,惟觀乎DMI嘅ADX同VHSI未見有大動作之下,唔通今日恒指仍然喺牛熊街貨中間位徘徊?都係繼續食住花生算。

至於噚日喺[下半part]講嘅吉利(00175),依家10點38分見實心陽燭,即高開低收,而日線圖上SlowSTC(14,3)%K線同%D線雙雙踩入「9」字頭嘅嚴重超買範圍,數值上雖然%K線未升穿%D線,但走勢上已經出現下行嘅跡象,可以繼續留意。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

#輪證贏家 #輪證下半Part #warrantsandcbbc

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads