熱門:

2019年11月19日 即巿股評 港股直擊

【盤房來料】內地憧憬減息要吼內房股

原來人民銀行已經四年都無將逆回購操作利率下調,噚日略為將呢個逆回購操作利率調低5個點子至2.5%,即被視作內地年底前嘅減息降準熱身準備,帶動中港股市持續反彈,恒指今早逼近二萬七關。

恒指低開9點後,雖然一度跌75點,見過26605點半日低位,但50日線(26660點)失而復得,其後轉跌為升,最多升287點,見過半日高位26968點,逼近20日線,即27000點即受阻。中午恒指報收26907點,升226點;國指報收10637點,升81點。

為成就阿里巴巴(09988)回歸大業,喺上市集資期間,個市點都要好好睇睇,要托高個指數,最直接梗係掃騰訊(00700)呢隻權重股,繼續日反彈逾2%後,今日反彈持續,半日再升1.6%,不知不覺間已升至335元,值得留意係又開始逼近340元巨大阻力區,一日唔上番340元,若然騰訊無法突破340元留上,暫時都仲係區間移動,仲要喺區間頂部,仲追唔追貨,大家應該心中有數。其他重磅股好似大笨象(00005)同港交所(00388)都分別升1.9%同1%,其餘重磅股表現唔錯,只有友邦(01299)今日瞓著咗無份升,而中海油(00883)則逆市跌1%,係表現最差藍籌股。

板塊方面,之前阿Man建議喺人民幣回勇下,要留意番啲內房股,今日人民銀行4年來首次下調逆回購利率,更勾起市場憧憬內地貨幣政策趨向寬鬆,資金自然追捧內房股。板塊內股份升幅由0.4%至超過2%不等,升勢唔算強勁,但亦有批捧場客。

另一個表現較出色板塊,係手機股,由於10月5G手機出貨大增,市場憧憬內地進入5G換機潮,加上iPhone 11在內地銷售理想,以及美國延長對華為禁運寬限期,都利好手機設備股。一對龍頭孖寶瑞聲(02018)及舜宇(02382)分別升4%及3.4%,其他手設股閒閒地升2%以上,而丘鈦(01478)獲大行調高目標價,半日升幅更達8.2%。

醫藥股從來都係逢低吸納嘅對象,噚日阿Man都有提到,只要回調見跌勢喘定,搵到支持又可以撈貨,今日整個板塊全線上升,石藥(01093)派完季度成績表後,有大行調升其目標價,刺激其股價半日升4.3%,盤中更一度見21.8元逾一年高位。特別一提平安好醫生(01833)企定58元,半日升3%,有信心再重返前高位,甚至創新高,仲有貨值得坐定定。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads