熱門:

2019年11月7日 即巿股評 港股直擊

【輪證贏家】真係跌唔落?

噚日港交所(00388)公布業績,雖然純利錄得倒退,不過無損噚日港交所走勢,但日線圖上見港交所喺噚日同前日受制於100天線同250天線,再加上SlowSTC(14,3)上到嚴重超買水平,而14RSI亦見高位,於是就揀定隻港交熊(61275),吼5分鐘圖見超買時小注落場。

又真係喺下晝2點45分至3點呢段時間,見到港交所5分鐘圖SlowSTC(14,3)上到嚴重超買水平,反正呢排個市靜過鬼,於是就小注落場,按嗰段時間(61275)高低位做過關0.102/$0.0101,平均買入價$0.01015。雖然跟手喺下晝3點25分至3點55分見港交所5分鐘圖嘅SlowSTC(14,3)鐘擺落到超賣水平,不過(61275)嗰時最高只係做過$0.105,即最高賺幅就只有3.4%。

今早恒指開市微升2點,報27690點,喺開市頭嗰5分鐘,恒指一度升到暫時(截至10點8分止)高位27713點,跟手就回落,至依家做緊27578點,跌110點。至於港交所股價走勢同恒指相約,都係先升後回軟,但喺港交所5分鐘圖上,SlowSTC(14,3)喺今朝早10點時見過超賣,按當時(61275)高低位做過$0.105/$0.093,平均價就係$0.099。

依家10點12分,睇返港交所日線圖先,今日粒燭都算叫做升得到100天線($250.6)同250天線($250.57)以上水平,而下方SlowSTC(14,3)嘅%K線已經喺高位向下跌穿條%D線,似乎有50掉頭向下嘅格局出咗嚟。

剩返嗰50%係乜?就要睇個市。等咗咁耐似乎大家都等到今日恒指見紅,暫時(截至10點19分止)終止咗五連升。同樣地SlowSTC(14,3)亦見遇頂回落,不過依家嘅跌幅好似比今朝縮咗好多,睇嚟個市有跌唔落嘅理由。

開恒指牛熊證街貨圖睇睇,怪不得啦,依家10點21分,恒指做緊27652點,熊證最貼價街貨層為27700至27799點,呢度有相當於185張期指;至於重貨區就上移至28000至28099點,呢度有相當於1140張期指。若然純以重貨區貨量多寡比較嘅話,咁牛證重貨區嗰1169張期指就稍為勝一籌,不過呢一層喺26900至26999點,話就話都係牛證最貼價街貨區,但用頭先mark低嗰口價嚟計,假設要大市向下行到去呢一層而又要食晒嘅話,咁就要由現價向下跌多752點。

如果將呢個點數反轉向上加,即27652+752=28404點,咦?雖然只係上到去熊證重貨區嗰層嘅門口,但係呢個點數對於熊證嚟講已經橫掃三層街貨,呢三層夾埋有相當於1527張期指。咁唔怪之得恒指喺10點28分嘅跌幅已經縮到得返3點啦,睇嚟都要睇實隻港交所,有咩事(61275)都係要坐救生艇走先。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads