熱門:

2019年10月18日 即巿股評 港股直擊

【盤房來料】港股二萬七關前要整固

美企繼續公布業績,大部份都交足功課,不過中美貿易談判仍存變數,美股表現較為反覆。至於香港呢邊就反覆偏軟,陀地地產股急升過後見回吐,拖累指數回落。加上內地公布第三季GDP增速創27年新低,只有6%,令港股高開低走。

恒指高開62點後,一度升幅擴大至136點,見過半日高位26985點,創9月16日以嚟逾一個月高位,不過二萬七呢一關唔係話過就過,結果越關不成就掉頭向下,曾倒跌72點,見過半日低位26776點。其後跌幅收窄,中午恒指報收26824點,跌24點;國指中午報收10592點,升3點。大市成交淡靜,半日不足400億元。

騰訊(00700)升0.5%,暫時都係咁上下,其他重磅藍籌股個別發展,大笨象(00005)又傳裁員,不過就燒唔到香港呢一邊,股價半日微跌0.16%,仲企穩60元樓上。地產股連升個半交易日後,今日見回吐,不過相對呢兩日升幅,回吐幅度好有限,估計喺新樓按政策下,本港樓市氣氛將有改善,有助發展商推新盤。

地產股回氣,資金另覓出路,轉炒醫藥股,呢個板塊長炒長有,阿Man都話每次回吐就係低吸好機會。石藥(01093)半日升3.5%,係升幅最大藍籌股,其他醫藥股普遍錄得2%或以上升幅。

另一個阿Man愛不釋手嘅板塊,就係一直未受貿易戰影響嘅物管股,雖然中美貿易談判有進展嘅時候,呢個板塊曾被冷落,但今日板塊多隻股份再度尋頂。其實升破咗高位,就係進入無障礙通道,之前回吐稍作整固,又可以再創新高。值得留意中海物業(02669)已平上市新高,半日升近半成,當然可以更上一層樓。其他物管股都有理想表現,只有碧桂園(06098)半日倒跌。

之前阿Man推介嘅平安好醫生(01833)已順利升抵60元目標價,繼續持貨與否自己決定,不過阿Man就開始轉移視線睇住另一隻新經濟股閱文集團(00772),今佢現價距高位仲有大把水位,加上股價喺25元附近成功尋底,完成整固後,近日再展升浪。日前成功回補於8月13日所遺下嘅下跌裂口重上30元水平,只要企穩喺30元樓上,守住多條移動平均線之上,下一個目標自然就係向住250日線,即35元水平出發。集團跟迪士尼中國達成合作協議,雙方共同公布,星球大戰系列中文電子書於閱文旗下數字閱讀平台首次亮相,係迪士尼首次在國內開放星戰小說嘅電子版權。泊得到迪士尼呢個大碼頭,星戰小說電子版只係個開始,迪士尼咁多經典故事,食住呢條水,閱文肯定有錢途。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads