熱門:

2019年9月20日 即巿股評 港股直擊

【盤房來料】港股周末前夕悶局難破

隔晚美股個別發展,其實美股本身都無乜方向,而港股連跌四個交易日後,噚日恒指考驗過20日線(26392點)有短暫支持,今日暫時高淡爭持,半日波幅窄到只有117點。恒指高開63點後,一度升95點,見過26565點半日高位,其後掉頭向下,亦跌過22點,低見26446點,其後就窄幅拉鋸。中午恒指報收26477點,升8點,國指則跌2點,半日報收10383點。

A股繼續跑贏表現略勝港股一籌,主要係收市後富時全球股票指數,A股因子將由5%提升至15%,唔知港股會否受呢個因素影響,形成此起彼落局面。重磅藍籌股個別發展,騰訊(00700)已連續十幾日進行公司回購,但股價未見有太大起色,仍然偏軟,唔知跟馬化騰開始淡出騰訊有冇關係。至於友邦(01299)一直未能重上80元後,股價呢個星期開始腳軟走樣,技術走勢向下,暫時不宜沾手。其他重磅股以石藥(01093)升逾2%,半日表現最好。

至於早兩日熱炒嘅手機設備股,今日普遍回套,華為剛公布新旗艦手機Mate30,但有消息指未有預載一系列Google手機應用程式,或有機會影響銷情,拖累手設股先升後倒跌。阿Man都講過家下任何一個板塊落鑊,參與炒作轉身要快,始終港股仍然熊蹤咋現,始終未係博命時候。

板塊都係借消息炒作,國務院印發《交通強國建設綱要》,目標由2021年到本世紀中葉,分兩個階段推進交通強國建設,今日輪到基建股落鑊。講真,呢個板塊又係落後咗啲,難得有個消息借嚟炒炒,當然唔會放過大好機會。

9月份僅餘一個星期就結算,港股嘅反彈蜜月期隨時告一段落,今個月期權call同put重貨區分別喺27000-27300,以及26000至26300,估計結算都喺呢個範圍之內。除非下周有好震撼消息出嚟,否則9月份餘下嘅交易日,可能就係上上落落,悶下悶下咁渡過。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads