熱門:

2019年9月12日 即巿股評 港股直擊

【盤房來料】恒指250日線暫仍未見影

中美雙方互拋橄欖枝,中國先豁免部份美國進口商品關稅,美國就延遲加徵3000億美元中國進口商品關稅,雙方喺10月初第13輪談判前釋出善意,貿易戰氣氛繼續緩和。可惜港股唔知係咪噚日升定咗先,今朝高開後,未能完全回補8月2日所遺下嘅巨型裂口,高位見回吐,250日線當然繼續無影,半日走勢較為反覆。

恒指高開124點,見27283點已經係半日高位,雖然亦為8月初以嚟高位,可惜無以為繼更調頭向下,一度再失二萬七關,最多跌191點,見過半日低位26967點。中午恒指報收27118點,跌40點;國指則升30點,半日報收10595點。

重磅股個別發展,騰訊(00700)一度重上350元,但以前都講過350-355元係短期巨大阻力位,邊有話咁易突破,半日報收349.2元,升幅唔夠1%。至於升咗幾日嘅大笨象(00005)則回吐近1%,暫守60元大關。其他重磅股表現麻麻,只有平保(02318)半日仍錄得0.6%升幅。

港交所(00388)較受市場注目,噚日宣布以近2900億元天價收購倫敦交易所(LSE),如意算盤未知打唔打得響,但股價則應聲而下,半日急挫3.6%,大成交下跌相當濕滯。噚日小加同志喺收市後而電話會議向分析員解釋呢單世紀大刁,竟以羅密歐同茱麗葉嚟形容港交所跟倫交所關係,眾所周知呢對莎翁筆下戀人結局,比悲傷更悲傷,今次港交所提出嘅收購計劃睇嚟都係凍過水。

先睇睇倫交所對港交所收購建議嘅回應係「不請自來的、初步的、高附加條件」方案,純睇字面意思,意味住倫交所對於收購建議唔多likely,其中一項條件係要刹停倫交所早於7月提出向Refinitiv收購,即係人哋本來好地地有段大好姻緣,家下你嚟搶親,倫交所唔滿意好正常。而倫交所亦已放風,無打算放棄呢項收購計劃,如此一來經已無得傾。

唔睇表面呢頭親事雙方條件難以吻合,深一層喺政治層面上,亦唔見得米字旗國會就範,皆因倫交所為倫敦呢個國際金融中心三大支柱之一,肯定當地政府基於國家安全考慮,唔會咁輕易批准呢項交易。即使米字旗國要面對脫歐,亦唔代表歐盟對呢項交易會置之不理,甚或美國海外投資委員會(CFIUS)亦有機會差隻腳埋嚟。

查實早於2000年開始,德意志交易所、納斯達克交易所、瑞典OM Gruppen、抑或洲際交易所等,都曾對LSE起痰,提出過併購計劃,可惜無不鎩羽而歸,唔見得港交所有特異功能可以打破詛咒。小加同志用得羅茱之戀嚟形容今次交易,唔知係咪畀定貼士大家,港交所捱沽亦屬意料中事。

至於之前受累貿易戰嘅出口股,喺中美雙方關係有所緩和之際見反彈,預期喺下月談判前,有關貿戰敏感股,應該可以做番好啲。醫藥股調整咗個幾星期,今日擺脫弱勢見反彈,其實阿Man一直睇好呢個板塊,每次調整就係入市機會,只係要留意唔少醫藥股今年累積一定升幅後,估值已唔算便宜,小注怡情還可以,現水平已過咗可以大注博命嘅時候。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads