熱門:

2019年9月12日 即巿股評 港股直擊

【輪證贏家】落場?不了...

噚日朝早揀咗兩隻恒指牛出嚟,分別係(55234)同(55317),基於個市喺噚日上半場無啦啦彈升逾400點,搞到(55234)同(55317)由貼價都變得唔貼價。

上半場見住咁升法,硬追唔係唔得嘅,但點都想等個靚少少嘅位先落場。拆開恒指5分鐘圖見最似樣可以落到場嘅位就係下晝2點45分至2點55分,呢度時間5分鐘圖上有見過SlowSTC(14,3)落到超賣位,大約落到2X呢啲位到啦,而同步(55234)同(55317)高低位分別做過$0.066/$0.061同埋$0.086/$0.081,平均買入價就係$0.0635同$0.0835。

咩位走?梗係再等恒指5分鐘圖SlowSTC(14,3)由低位上返去超買位啦,其實講緊臨收市前5分鐘,恒指5分鐘圖SlowSTC(14,3)真係上到超買呢個位,呢段時間我噚日就係同我老友吳家順吹緊水,喺臨收市前三分鐘佢同我講「喂,再傾,平咗倉先」,收咗線之後其實我都拿拿聲走貨先,一來大家都知我唔多鍾意坐貨過夜,二來其實我都差啲醒唔起,掛住同佢傾喺我呢度開專欄一事。依家諗返...臨收市前三分鐘...唔通同佢個「吳系仨分鐘」有關?我估啫。

今朝未起身已經收到message話特朗普押後啲關稅,再加埋噚日港交所(00388)提出同倫交所合併,作價有22%溢價,今朝恒指高開124點,報27283點,不過依家10點22分見恒指高開低收,倒跌147點,做緊27011點,日線圖上見今日恒指粒陰燭企喺條50天線26997點)之上,換條保歷加通道出嚟睇嘅話,今日叫做第二日踩住條保歷加通道頂(27166點),而整條保歷加通道形態就仍然向上。

睇埋恒指牛熊證街貨圖,上方熊證第一層27100至27199點今日一開市就全數被殺清,呢七友就只有116張期指,比噚日少咗387張,同噚日預計呢一層街貨會四散嘅一樣。咁走去邊?牛證同熊證都各有新增期指張數,而上方熊證重貨區退守到27600至27699點,呢度有相當於938張期指,至於下方牛證重貨就係25800至25899點,有相當於644張期指,而呢一層係第八貼價街貨層,「點解退到咁後嘅?」唔係,只係有七層新層街貨層面世啫,最貼價牛證已經拉到上26500至26599點,呢度有相當於592張期指,絕不失禮。

依家10點33分,見恒指仍然企喺27000點樓上,同上方熊證係比較貼價,之但係擔心嘅就係日線圖上SlowSTC(14,3)確係有嚴重超買準備下行嘅跡象,係無咩心水嘅時候,我個Whatsapp係咁彈啲message出嚟,原來工作上嘅朋友、vendor已經陸陸續續收到我寄出去今年嘅中秋禮盒:兔兔燈籠同手工曲奇,又係時候要同佢哋聯誼一番,今朝個市都係...不了...

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。