熱門:

2019年9月11日 即巿股評 港股直擊

【輪證贏家】新上市貼價牛啱Day trade用

噚日揀咗隻恒指牛(54953)出嚟,朝早10點零嗰轉入唔到,唯有繼續等,等到臨收市前半個鐘,恒指5分鐘圖見到SlowSTC(14,3)落到超賣水平,係無朝早個超賣咁靚嘅,但呢位都算叫做靚嘅,不過就要有過夜嘅準備。呢個時候按(54953)高低位做過$0.082/$0.079,平均買入價就係$0.0805。

今朝大家關注嘅應該係Apple部新機iPhone 11個spec係咩,同埋賣幾多錢,三鏡頭嘅Pro同Pro Max 64GB售價10000蚊有找,比起上一批新機嘅新價好似平咗啲。研究完一輪之後望望個鐘,恒指已經做完U盤,準備開市啦,開報26790點,升107點。不過開市無耐就見大市似乎想行高開低收嘅走勢,(54953)都係收隊穩陣啲,以開市首10分鐘走人計,(54953)高低位做過$0.091/$0.086,平均賣出價就係$0.0885,賺幅都接近10%。

Miss咗嘅都唔太緊要,依家10點23分時恒指升幅收窄至升63點,做緊26747點,而(54953)證價做緊$0.085,不過見恒指5鐘圖SlowSTC(14,3)開始有掉頭回落嘅跡象,出貨嘅可能要等下一個機會。

如果今朝一早走咗/未買到嘅又點?開恒指牛熊證街貨圖睇,上方熊證最貼價仍然都係26800至26899點,呢度有相當於110張期指,比噚日少咗264張,無他嘅,見到個市慢升殺熊咁款,仲唔走人咩。走去邊?一係就將熊仔防守線退到去27000至27299點,係呀,點數大位呀,亦都係重貨位嘛;又或者掉轉槍頭,加入牛軍,駐守25800至25899點重鎮(重貨區),呢度有1158張期指,真係非常吸引,好彩嘅係,牛證同現價(10點33分mark 26791點計)有逾800點差距。

「再博牛證再上殺熊咪得囉」,走勢上係可以嘅,唯一要小心嘅係今日恒指粒燭有啲偏離少少保歷加通道頂(26966點);再加埋天線出嚟睇嘅話,大家都要小心條50天線(27025點)。而除咗熊證近又多貨呢一個吸引力之外,目前見保歷加通道唔止個口拓闊,而係整條通道都向上運行中。

今日終於有再貼價啲嘅恒指牛出場,進取嘅可以考慮(55234),收回價26523點,同現價有逾200點差距,而同一收回價之中佢仲要最高槓桿,有約78.68倍,所以僅適合短炒之用,勿過夜;安全嘅可以睇遠少少嘅牛證,如(55317),收回價26288點,同現價有逾450點差距。用返一貫落場嘅方法就OK啦。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads