熱門:

2019年8月23日 即巿股評 港股直擊

【輪證贏家】Day Trade 好啦

噚日本身諗住見到友邦(01299)績前受壓,揀定隻Put(16828)出嚟睇吓有無位可以小注落場,博佢第二日就算業績靚仔,但都敵不過市跌呀,結果下個下晝友邦5分鐘圖SlowSTC(14,3)只見喺中軸橫行,根本就搵唔到位落場。

今朝起身,業績係符合市場預期,大行都無話啲乜,今朝友邦股價高開升1.4%,開市報$77.35,升穿20天線($77.223),不過到依家9點51分止,暫呈高開低收,見呢排友邦被條20天線頂住,貪心鬼想用佢5分鐘圖上嘅SlowSTC(14,3)吼就嚟上到超買,打算輪淡倉做day trade嘅話,你可以用返隻(16828),因為呢隻Put都有19.6倍槓桿,一係就揀隻熊證槓桿係高過(16828)嘅。依家10點4分,友邦5分鐘圖上嘅SlowSTC(14,3)準備回落,快手嘅小注吼呢一注。

換返去睇恒指,5分鐘圖都見到SlowSTC(14,3)上到8X呢啲位,Day trade就準備著手一隻高槓桿熊落鑊,可能好似打邊爐烚響鈴咁動作要快。拉返個日線圖出嚟睇,依家10點7分,恒指暫呈「十字星」依家雖然點數上仲係升緊,不過日線圖上粒燭嘅位置就下行咗,仲貼近返10天線(25857點)水平。

至於恒指牛熊證街貨圖方面,牛熊兩邊都未見有新增街貨層,兩邊最貼嘅分別係25900至25999點同26300至26399點,中間位仍然都係(26300+25999)/2=26149.5。按目前10點10分恒指現價26100點計,數值上的確係處於中間位之下,但講緊都只係相差49.5點,實在不為過。

呢幾日大市咁吽,有估過個市係想儲多啲街貨先至再殺,望望月曆,今日都823啦,下個星期四(8月29日)就期結;再睇多次個街貨圖,熊證最貼價嗰層26300至26399點,有相當於440張期指,但重貨區就向下移咗一層,至26400至26499點,有相當於687張期指。而本身重貨區位置26500至26599點,今日睇就得返590張期指,有126張喺噚日流走咗。

下方牛證最貼價就係25900至25999點啦,呢度有相當於748張期指,仍然都係牛證重貨區,只係新增期指張數唔多;至最多新增嘅層數就係25700至25799點,呢度新增咗239張期指,total見到有596張期指。

依家10點24分,拆恒指5分鐘圖見恒指今朝chok完兩嘢跟手再向下行,依家見SlowSTC(14,3)仍然處於7X水平,偷位入熊唔係唔可以,但一定要動作快,一來今日星期五,唔覺意過夜就變過weekend;二來今晚美聯儲主席鮑威爾將會喺今晚(香港時間)舉行嘅央行年會上發表講話,被外界視為「尋找聯儲的未來政策」,你點知佢會講乜?再者,就算你估到佢講乜,你估到特朗普唔會接力?

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads