熱門:

2019年8月22日 即巿股評 港股直擊

【盤房來料】港股乏利好消息支持繼續反彈

中美貿易關係前景仍充滿變數,本港局勢發展亦受到市場關注,港股較早前反彈後靠穩,今早再受壓,二萬六關再受考驗。恒指高開2點,雖然曾升18點,見過26288點半日高位,其後沽壓湧現,最多跌261點,見過半日低位26008點。恒指中午報收26040點,跌229點;國指跌51點,中午報收10125點。

恒指險守二萬六關,重磅藍籌股乏善可陳,建行(00939)半日逆市升0.3%,其他重磅股大部份偏軟,騰訊(00700)跌0.1%算硬淨,不過335至340呢個阻力證明好難突破,暫時騰訊就喺250日線附近爭持。至於明日派成績表嘅友邦(01299)半日跌1.6%;大笨象(00005)跌0.6%;平保(02318)、工行(01398)等全部腳軟,無一倖免。至於已派成績表嘅煤氣(00003)不僅業績倒退,亦有可能減少派息,大行調低其目標價,而阿Man亦有提到,煤氣短線沽壓唔細,家下已跌到落250日線,未知呢個位頂唔頂得住,一旦失守15樓下見。

平靜咗兩三日嘅香港,隔晚又再喺元朗發生警民衝突,再次令缸邊友擔心政治情況未能改善之餘,更加係每況愈下之勢,拖累陀地地產股普遍下跌。恒地(00012)公布業嫧大幅倒退,同時公布出售元朗跟和生圍地皮,喺呢個敏感時刻,出售敏感地帶地皮,確有點耐人尋味,投資者摸不着頭腦,唯有先沽貨離場,股價半日跌3.7%,藍籌之中跌幅最大。其他本地地產股全線下跌,其實唔少地產股現價估值已唔算貴,至少相對仍然高企嘅樓價,地產股股價唔單止合理,更可以算超值。可惜本港前景充斥住不明朗因素,再平嘅本地地產股,暫時仍乏人問津。

汽車股逆市做好,吉利汽車(00175)派完成績表,有大行唱好, 股價半日升逾半成,藍籌之中跑第一,連帶其他汽車股做好。不過阿Man都係嗰句,汽車股近呢一年以嚟,次次落鑊都相當短癮,小心高追又中伏。

暫時唔見得有乜嘢利好消息可以支撐港股再向上反彈,雖然聯儲局上月會議紀錄已暗示下月減息機會高,可惜港股未能受惠呢個消息向上,睇嚟港股暫時都係繼續喺25800至26300點之間上落。

 

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads