熱門:

2019年8月9日 即巿股評 港股直擊

【盤房來料】濠賭股四面楚歌 易跌難升

人哋美股跌咗幾日後,隔晚就出現咗個較似樣嘅反彈,有口痕友話美股班大戶都未逃跑,當然要頂硬上,buy time有秩序疏散,所以美股肯定繼續跑贏港股,港股就注定無乜運行。至於港股呢,今早都曾跟隨美股高開,可惜有心無力,再加上內地PPI差過預期,陪埋內地股市齊齊攬炒,特別慘情。

恒指高開158點,最高見過半日高位26313點,升193點,可惜內地公布PPI差過預期,港股急轉直下,最多跌135點,見25985點半日低位,半場收市前跌幅收窄,恒指二萬六點失而復得。恒指半日報收26073點,跌47點;國指則跌5點,半日報收10036點。

幾隻重磅股都腳軟,友邦(01299)跟港交所(00388)分別跌1.2%及1.5%,港交所就算有大行報告指現價買得過,但缸邊友睬你都傻,目前咁嘅市況,盡量減磅要錢唔要貨。至於騰訊(00700)繼續擔任其維穩角色,雖然上半場盤中一度倒跌,但中午仍然靠穩升0.1%。

中資電訊股包出,噚日派成績表嘅中移動(00941),雖然盈利表現略遜預期,但中期派息比率增加,以利息及引好息之徒,亦獲券商睇好,上調其目標價,股價今日一度升4.6%,半日升幅仍接近4%。噚日中移動記者會,向在場人士派發雷射筆,有網民笑言中移動曲線支援已釋放嘅被捕學生會會長,屬良心央企要支持,其實都係得啖笑。相關業績會紀念品,公司表示早於年初已準備,今早股價上升,主要係有大行唱好兼以息誘股東,實際上跟雷射筆紀念品應無關係。其他內地電訊股亦做好,主要係投資者預期,喺中移動表態5G開支唔會大增下,其他電訊股都係咁上下。

相反5G概念股就畀中移動呢個消息打殘,多隻5G概念股捱沽,加上美國禁正聯邦機構從華為及中興(00763)等採購電訊設備,中興半日挫近一成,其他5G概念股普遍跌2%或以上。

有澳門博彩機構CEO指香港近日嘅示威活動,嚴重打擊澳門博彩業收入,整個板塊難逃一跌。其實講開又講,阿Man早於去年初,已表示濠賭股高峰已過,尤其自內地幾年前大力打貪後,澳門博彩公司旗下貴賓廳生意一落千仗,再加埋去年貿易戰開打,而明年再就發牌及續牌再作檢討,濠鍺股呢一年半截同樣易跌難升。即使現價已較前高位下跌無少,暫時係資金搵唔到藉口入場,難怪股價低處未算低。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads