|
熱門:

2019年7月17日 即巿股評 港股直擊

【輪證贏家】跌幅收窄為儲肥牛?

今朝坐巴士嗰陣見到恒指做完U盤後跌逾200點,仲whatsapp同戰友Jack講:嗰阻力(噚日畫嗰個)都幾強。但依家9點51分,返到公司開晒電腦電視,沖埋茶再返埋位,見到個市跌幅收窄到得返114點,做緊28505點。日線圖上見恒指仍然處於「楔形」同「下降通道」嘅裡面,但似乎恒指仲未完成現階調段整,博爆單邊嘅話要等多一陣。

點解咁講?除咗因為見到「楔形」個口仍然擘得比較闊之外,留心睇返下方DMI嘅ADX,其實喺恒指調整/處於「楔形」期間,ADX係一直下行走,即係話呢個調整大家都無出過啲咩力(你見唔係有好多牛熊死傷就知);再睇埋恒指波幅指數(VHSI),日線圖見SlowSTC(14,3)落到超買水平,依家(10點9分)VHSI做緊14.65,都係一個近期偏低嘅水平嚟架,一個唔該VHSI觸底反彈同時,DMI嘅ADX配合比力,即係個市有機會出現一個有力爆單邊嘅市況。

爆單邊會爆邊邊?開恒指牛熊證街貨圖睇,牛熊兩邊重貨區同現價至少有五層嘅距離,唔係啲資金移位,而係下方牛證有新嘅證上市嘅同時,上方又未打到舊熊證嗰啲街貨,所以就愈移愈後。依家10點12分,大市仍然見紅,不過如果你話個市用「跌幅收窄」呢一招,先慢慢上行食熊,同時再引多啲貼價牛嘅街貨。如是者來來回回幾趙嘅同時,大市嘅波幅收窄(keep返住個「楔形」調整),然後再按當時牛熊街貨邊邊多貨走嚟爆嘅話,成件事係咪好合理呀?

假設呢個故仔係成立嘅話,換言之依家只可以做到嘅係用「楔形」嘅頂同底做Trade。明白依家個市粒燭頂住個100天線(28621點)+「楔形」+「下降通道」頂部係應該出熊/Put,但見到近牛街貨少得可憐買唔落手;不如咁,事前係假設咗大市跌幅收窄係為咗引定近牛街貨,朝早就由得佢引飽佢,到下朝嘅時候,如果個市未穿到個100天線(28621點)+「楔形」+「下降通道」頂,先再諗小注熊/Put,索性呢鋪揸過夜,博佢再落,專心儲肥牛啦。

溫馨提示,經過早幾個月前做完深層洗牙+定期覆診,聽日就要再去返診所度做多次檢查,check返倒底做完深層洗牙之後依家個情況係點(牙醫話即係派成績表喎),所以今日[下半part]要暫停一日,請見諒。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。