|
熱門:

2019年7月5日 即巿股評 港股直擊

【盤房來料】強者愈強 愈者愈弱 高下立見

隔晚美股假期休市,港股又適逢周末前夕,今日港股缺乏方向,半日好淡拉鋸,恒指波幅僅165點。恒指低開10點後,曾跌80點,見28714點半日低位,其後又再反覆回升,見28880點半日高位。中午恒指報收28817點,升21點;國指中午報10897點,跌15點。

重磅藍籌股乏善可陳,最突出可算係吉利汽車(00175),突出嘅係跌得特別多,半日跌近半成,主要係有報告唱淡,連累其他汽車股齊齊受壓,普遍跌幅超過1%。其他重磅股表現好壞參半,領展(00823)再創新高,半日最高見99.8元逼近紅底關口,半日升1.6%。港鐵(00066)新高又新高,半日升0.3%,盤中曾見54元,暫時未見有回頭之勢,有貨喺手繼續坐定定。瑞聲(02018)跟舜宇(02382)分別跌1.6%及1.5%,呢個時候中美貿易關係雖然緩和,但貿易戰仍未完滿解決,手機設備股呢期都仍有風險,好難完全坐定定,炒作呢個板塊只有步步為營,摸石過河,醒目走位。

人民幣雖未完全回復強勢,但總算回穩企定,內房股今早個別發展,至於受主要股東王振華涉性侵女童案嘅新城發展(01030),分別遭野村跟高盛降級及狠劈目標價,更有評級機構將其列入負面觀察名單,股價跌完再跌,今日半日再跌1.9%。同系新城悅服務(01755)半日再挫6.1%,A股則跌停板。或者有缸邊友唔明,公司已即時撤換管理層,公司一人犯罪,理應唔影響業務運作,可以會被降評級又列入負面觀察名單,由於公司始終有負債,而負債唔排除由犯罪者作個人擔保,一旦犯罪者有乜事幹,公司被即使追債,公司運作定必受影響,呢個亦係阿Man奉勸大家切勿亂接飛刀。而其他內房股則個別發展,今日周末前夕,未有貨喺手倒不如再作觀察。

阿Man一直強調內需股係其中一個可以跑贏大市嘅板塊,之前阿Man推介過嘅日清食品(01475),今日升4.5%創6.29元上市新高,半日升3.3%。集團公布今日起,調高部份杯麵出廠價,消息帶動股價上升。

今日港股仍然處於牛皮局面,期指支持位仍然喺28600點,好淡分水嶺28800點,失守短線有機會支持下試28400,上面阻力為29000點。

麥狄文
(徐狄怡‧證監會持牌人 滙盈資產管理‧董事總經理)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。