熱門:

2019年6月20日 即巿股評 港股直擊

【盤房來料】人民幣回勇 炒作受惠板塊仍需小心

侵侵呢頭同習大大通完電話,令市場憧憬貿易戰好快可以結束,本來已經為大市注入一口威力巨大嘅強心針,但侵侵可能嫌唔夠多,再威脅要燉鮑爺冬菇,令聯儲局今次個議抹去對減息耐性一詞,為下半年聯儲局減息鋪路,除咗咁之外,歐央行行長亦暗示歐央行下半年或放水,更指侵侵先挑起貿易戰,如今更有可能導至貨幣戰爆發。不過市場唔理稍後會否爆發貨幣戰,只係集中焦點喺月底嘅G20峰會嘅特習會,以及歐美央行下半年放水,港股三日累積升逾千點。

恒指今早高開106點報28308點,之後升幅曾收窄至55點,見28258點半日低位,其後A股造好,港股回勇,半日最高升293點,高見28495點,為5月10日以嚟高位,亦逼近50日線及100日線嘅交匯點(28506點),恒指中午報收28486點,升284點;國指半日升117點,報10881點。

重磅股主要靠友邦(01299)跟騰訊(00700)發功,半日分別升1.8%及1.6%,合共為恒指貢獻近百點升幅,兩股已佔去半日超過三分一升幅。而四大內銀股則升0.5%及1.2%,其他藍籌股普遍上升。

A股急升利好內險股及券商股,平保(02318)及中國太保(02601)分別升逾2%,國壽(02628)跟人保(01339)則齊齊升逾3%。此外內地券商股嘅升勢更厲害,普遍升逾4%。A股回升,對內險股及卷商股當然係好事,只係人民幣呢一刻雖然靠番穩,但歐央行行長講得出貨幣戰一燭即發,一旦人民幣匯價再度受壓,A股又係有得震,冇得瞓,屆時呢兩個板塊又可能打回原形。即使對後市睇法變得樂觀,仍要小心審慎行事。至於近日回勇嘅內地航空股,同樣係受惠人民幣短線走強,同樣道理,炒作呢個板塊,一樣要步步為營。

美國減息有幾逼切,美國嘅經濟前景就有幾暗淡,既然經濟前景唔樂觀,金價升至5年高位亦不無道理,黃金相關股份爆升。黃金走勢預期喺美國減息周期展開後,只有愈戰愈勇,與期畀反覆嘅油價,難炒嘅石油股所迷惑,倒不如多加留意黃金相關股份。

而阿Man一直睇好嘅物管股強勢依舊,之前推介嘅奧園健康(03662)半日升近半成,佳兆業物業(02168)更創新高,半日升逾5%。其他物管股全線向上,呢個板塊仍然可以安安樂樂坐定定。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads