隔晚美股喺連跌兩日後總算彈番些少,不過侵侵突然宣布向墨西哥加徵關稅,無嗰樣整個樣,仲連自己手下都無面畀,當然打擊市場氣氛。加上內地採購經理指數PMI差過預期,令港股再度反覆向下。
恒指低開111點,報27002點逾四個月低位,不過市場憧憬阿爺會出招挽救經濟頽勢,A股倒升,港股亦止跌回升,最多升40點,見過27155點半日高位。可惜港股呢期都係反彈力度有限,隨後又回復跌勢,臨近中午收市跌幅收窄。恒指中午報收27066點,跌48點;國指則升12點,半日報收10462點。
大市仍能守住二萬七關,多得騰訊(00700)又撐起半邊天,半日升1.05%,暫時騰訊320元算係守住,不過想翻身未係時候,始終中美貿易關係仍然惡劣,唔知幾時邊日侵侵又向乜嘢科技公司發炮開火。除咗騰訊之外,平保(02318)亦升近1%,內銀股亦繼續支撐住。只係友邦(01299)跟大笨象(00005)腳軟,港股自然欲彈難彈。
之前阿Man講過要買陀地地產股對沖本港樓價上升,事實上本港樓價確係升唔停,4月全港私人住宅樓價指數升至390.5,按月升3.17%,只係港元近日走軟,1個月拆息向上,3個月拆息更逼年初高位。陀地地產股受壓,今日多隻地產股受壓。其實係目前嘅市況,一旦中美貿易戰繼續惡化,夾喺中間嘅香港定必成為犧牲品,香港經濟肯定大受打擊,即使再強嘅香港樓市,仍有受到沖擊嘅可能。加上香港樓價處於堅離地嘅歷史高位,下調空間一定有,香港樓價只升不跌嘅神話未必會真至永遠。君子不立危牆下,呢個時候連陀地地產股都企唔住,即係現金為王嘅時候已到。
阿Man亦有講過內房股喺呢啲時候要迴避,家下連陀地地產股亦不靠譜,似乎就只有物業管理股仍站得住腳。而近日呢個板塊確係跑贏大市,而今早更見碧桂園服務(06098)創新高,半日升3.5%,其他物管股半日升幅由1.7%至4.1%不等。仍持有物管股嘅缸邊友恭喜晒,暫時仍可以坐定定,至於喺後市仍唔明朗嘅情況下,未上車嘅就持現金更穩陣,唔排除喺六絕月有更好嘅入貨機會。
既然連較為安全嘅板塊都要等機會買,大市雖然仍然守住二萬七,但呢一關似乎岌岌可危。先係華為被封殺,依家又再到聯想集團(00992)再遭美商指控侵權,請求美國國際貿易委員會發起337調查,並發布有限排除令跟禁止令。對於內地企業一再被美國打壓,港股短期仍唔會有好日子過,呢啲時候都係靠邊站穩陣。
麥狄文
(徐狄怡‧證監會持牌人 滙盈資產管理‧董事總經理)