|
熱門:

2019年5月14日 即巿股評 港股直擊

【盤房來料】中美擦槍走火 保守為上策

上星期因為侵侵一句話,股市已翻天覆地,以為中美第11輪貿易談判繼續,有望喺星期五之前,截停美國向中國2000億美元進口商品加徵關稅至25%,可惜美國方面喺上周五落實加稅,雙方雖未至於無偈傾,但肯定呢一刻就唔多啱嘴形。轉過頭中國亦反擊,表示要向美國600億美元進口商品加徵關稅至25%,實行以牙還牙。呢個消息傳出之後,美股喺周一晚已跌到一仆一碌,而港股隔晚喺ADR跟新加坡黑期分別跌至27800及27600水平。

貿易戰升級,美股三大指數顯著下跌,恒指今早裂口低開599點,最多跌624點,見過27925點半日低位,失守250日線(28000點)。其後A股跌幅收窄,恒指跌幅亦收窄至344點,見28205點半日高位,成功收復100日線(28137點)。中午恒指報收28097點,100日線得而復失,半日跌452點;國指跌183點,報收10747點。

之前阿Man講過騰訊(00700)可以吼位低吸,果然今日股價跌穿370元即見買盤吸納,而唔少大行都調高咗騰訊嘅目標價,亦睇好其金融服務價值,認為現價被低估,而流動支付及雲服務組成嘅其他業務,收入增長有保證,預期金融科技將為騰訊帶嚟第二波高速增長。之前講過騰訊等365元至370元買入,家下大市跌到二萬八呢啲位,騰訊股價都仲係370元附近,睇嚟想再買平少少都有難度,370元左右儲貨差不多。雖然話今日騰訊跌咗2.3%,但以佢強勁嘅彈力,一日升番兩三個巴仙,重上380元無難度。

至於其他重磅股,以內銀表現較差,其他重磅股普遍下跌,而美國業務佔比較大嘅萬洲(00288)半日跌逾5%,藍籌之中排第尾。人民幣離岸急跌,兌美元喺6.9關口附近徘徊,內地航空股遭殃,三架紅色飛機全部急墮,國航(00753)跟南航(01055)齊齊跌逾7%,東航(00670)亦跌6.8%。人仔腳軟,內房股亦難逃一跌,今日閒閒地跌4%以上,龍頭中海外(00688)則跌1.6%,算係跌得少。

領展(00823)逆市創新高,曾高見96.7元,半日升3.1%,正邁向百元大關,阿Man等住見證領展晉身紅底股。除咗領展之外,兩電一煤同樣逆市上升,喺風搖飄搖之際收息股當然較受歡迎。中美雙方貿易關係仍緊張之際,預期雙方仍會拳來拳往,避免擦槍走火死咗唔知乜事,呢段時間都係保守為上。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。