出得嚟行,預咗要還,侵侵變腳反枱,出帖凶人,美股周一大步檻過,先急跌後收市前收復大部份失地,但係去到隔晚,市場終於按捺不住,一次過計數,三大指數急挫,跌幅超過1.5%。隔晚港股亦被拖落水,ADR跟夜期跌超過400點,預咗今早港股會出現呢個星期嘅第二個下跌裂口。
恒指低開375點,失守29000關,即失50日線(29326點),最多跌399點,見過半日低位28963點半日低位。其後跌幅收窄至111點,見過半日高位29525點。可惜內地上月出口差過預期,恒指再度跌逾200點,恒指中午報收29156點,跌206點;國指則跌101點,報收11159點。
以美股隔晚嘅跌幅,再加埋內地出口數字疲弱,本來港股就唔應該跌咁少,不過騰訊(00700)又嚟單天寶至尊,公司旗下已獲批版號嘅遊戲《和平精英》繼承咗「食雞」遊戲《絕地求生:刺激戰場》嘅玩家數據,最重要係獲准收費,呢個喜訊嚟得及時,刺激騰訊股價逆市走強。盤中騰訊曾高見395元,中午報收390.8元,前日喺370元搵到支持,今早則升穿380元短線阻力,股價向上突破。單係騰訊嘅升幅,已抵銷咗恒指80點跌幅。
不過其他重磅股仍然疲弱,尤其金融股普遍跌逾1%,市場擔心一旦中美談判破裂,環球經濟將被嚴重拖累,百業之母嘅金融業當然首當其衝,金融股無論國際級,抑或內地代表,全線下跌。
雖然中國談判代表團包括副總理劉鶴都如期赴美,話就話第11 輪中美會談繼續,但雙方重返談判桌,談判結果係好係醜好難講。當然阿Man傾向相信中美雙方都唔想攬炒,只係美國指中國出爾反爾,違反之前10輪談判嘅承諾,堅持喺周五美國東岸零時一分起上調中國2000億美元商品關稅至25%,一旦雙方呢兩日談判毫無進展,甚至一言不合反枱,貿易戰升級都咪話唔大鑊。不過一個銀仔有兩面,加上侵侵一向神神化化,若然又嚟一個急轉彎,中美雙方又話好好傾,玩吓手屋手言和兼準備簽協議,成個故事發展又唔同晒。即係咁,喺中美第11輪貿易談判期間,可以一係富貴,一係閉翳,既然無得估,同賭博無分別,不如離場觀望更穩陣。
為咗遠離市場,阿Man明日起外遊渡長周末,明日及後日嘅《盤房來料》暫停,以及下周一喺《信報》嘅《金融街密語》將停刊一次,下周二起回復正常。
麥狄文
(徐狄怡‧證監會持牌人 滙盈資產管理‧董事總經理)