熱門:

2019年5月3日 即巿股評 港股直擊

【盤房來料】大笨象績佳變身小飛象

美股隔晚繼續回吐,港股同噚日一模一樣低開低走後拗腰向上,可能少咗A股阻頭阻勢,港股繼續喺10日線(29842點)及20日線(29900點)嘅滙聚區附近徘徊,30000點阻力仍大,不過呢恒指喺29600又頂得吓,期指29400亦同樣具定海神針作用。

恒指低開125點,開市後最多跌265點,再度失守兩條移動平均線,其後拗腰倒升,半日一度倒升2點,見過29946點半日高位。恒指中午報收29937點,微跌6點;國指則跌11點,報收11545點。半日成交額得番352.9億元,周末前夕預咗成交縮水。

今日大市焦點應該都係大笨象(00005),雖然上半場派成績表前唔多精神,不過中午公布首季業績,除咗前盈利按年增長三成至62.13億美元,好過市場預期嘅中位數55.874億美元,相信午後開市將發力向上,變身小飛象,股價料向住70元,之前阿Man所訂嘅目標價挑戰,並有望帶動大市重返三萬大關。除咗稅前盈利優於預期之外,股本回報率(ROTE)亦按年增長2.2%至10.6%,相當接近集團訂下嘅2020年前ROTE達11%水平嘅目標。至於阿仔恒生(00011)獲大摩調升目標,半日升1.8%,中午宣布派第一次中期息,真正嘅有升有息。

由於中美貿易談判進展理想,更有消息指雙方最快可於下周五前達成協議,更有機會出現另一次嘅習特會,以落實貿易協議。因為呢個消息,唔少出口股今日乘機落鑊。創科實業(00669)、申洲(02313)、敏華(01999)等,升幅均超過2%。亦因為同一原因個別航運股亦有資金追捧,股價普遍升逾1%。

領展(00823)今日再創新高,半日再升0.3%,係另一隻令人期待變身紅底股嘅重磅股。雖然唔少人都望香港樓價可以回一回,甚至爆一爆煲提供上車機會,但樓價喺低息環境持續下高居不下,與其等樓價仆落去,不如長線投資陀地地產股對沖樓價,今日地產股又有唔錯表現。

阿Man提過佳兆業服務(02168)係估值較低嘅物管股,不負阿Man所望,今日股價升近4%表現突出,目前向住阿Man目標價12.5元出發,只要升勢保持,同埋股價企穩喺20日線上面,一於畀啲耐性坐貨等達標。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads