港股假期前腳軟,由於內地PMI遜預期,港股彈完兩日之後,今日下跌,幸而A股假前靠穩回升,帶動港股跌幅收窄。恒指低開64點,其後跌幅曾收窄至37點,見過半日高位29855點。但內地公布4月官方PMI為50.1,略差過預期,港股沽壓增加,最多跌272點,見過半日低位29620點,再一次失守10日線及20日線嘅匯聚區。其後跌幅收窄,中午恒指報收29748點,跌144點;國指跌75點,報收11562點。呢兩日成交愈玩愈縮,今日半日連400億成交額都唔夠。
重磅藍籌股普遍腳軟,騰訊(00700)跌0.7%、友邦(01299)、港交所(00388)都下跌,不過大笨象(00005)跟中移動(00941)則逆市靠穩微升。內銀股派完成績表之後受壓,四大行全跌無一倖免,跌幅唔超過1%。至於交出一份靚仔成績表嘅平保(02318),有大行調高其目標價至113元,其實阿Man都一直等緊平保變身紅底股,暫時好淡爭持,半日升0.3%。國壽(02628)則半日無起跌。
侵侵唔滿意高油價就係人都知,屢次出口術遏抑油價,講咗N次三桶油無得搞,有波幅,無升幅。油價噚日軟一軟,三桶油今日除中石化(00386)逆市升0.5%,中石油(00883)及中石油(00857)跌1.5%。油價無得升係死症,下次見油價有一下激動,亦可以對三桶油落鑊視而不見。
低息環境持續下,地產股應該有運行,不過地產股今日卻見回吐,不過反而提供上車機會,只要地產股守得住條50日線,可以考慮收集。至於5G概念股亦回吐,手機設備股瑞聲(02018)半日跌2.8%,係表現最差藍籌;舜宇光學(02382)亦跌2.1%。
雖然萬洲(00288)首季收入按年跌逾兩成,但績後反而有資金追捧,主要係專家睇豬牛價格今年將顯著上升,而商務部亦指內地豬肉價格按周升0.8%,睇嚟豬價今年升勢不可擋,萬洲半日升7.3%,係最大升幅藍籌。
港股明日假期,跟住又到內地A股連休3日,缸邊友都唔多願入場,噚日港股成交額已不足800億元,估計今日亦唔會有乜起色。暫時指數仍然喺29400至29800之間窄幅波動,而期指因為除淨因素低水,暫時29400見支持,不過29400失守,下試29000-29100機會甚大,上面阻力29800至30000。除非中美貿易談判有重大突破,否則港股短線都係唔上唔落居多。
麥狄文
(徐狄怡‧證監會持牌人 滙盈資產管理‧董事總經理)