熱門:

2019年4月26日 即巿股評 港股直擊

【盤房來料】周末前夕成交愈玩愈縮

美股繼續追蹤住企業成績表而行,道指重磅股3M因為業績倒退,股價單日大跌近13%,拖累道指跌逾百點,不過亞瑪遜營業額大增股價做好,Facebook亦上升,帶動納指盤中再創歷史新高,標指亦上升。港股早段見過近月低位後反彈,可惜A股下跌仍拖住港股後腿,港股反彈升勢受阻。

恒指低開36點,最多跌45點,見過29504點今個月低位,其後喺29500點見支持,拗腰倒升122點,見29672點半日高位,但A股勢弱,恒指升勢回順。恒指中午報收29583點,升33點;國指升9點,報收11511點。

騰訊(00700)低開見380元,不過呢個位似乎有唔錯支持,其後倒升見過385.8元半日高位,中午報收383元靠穩。今日較為意外係中移動(00941)反彈1.5%,成為支撐大市嘅主力藍籌。其他重磅股個別發展,有升有跌。至於地產股呢,內房股今日反彈,陀地地產股反而回吐。都係嗰句,內房股始終有政策風險,但陀地地產股呢,受惠低息環境及樓價持續向上,要揀當然係低吸陀地地產股。

之前提過W股喺今年7月或有機會被納入港股通,成為互聯互通交易股份,資金近日流入呢個板塊炒消息,小米集團(01810)及美團(03690)半日升1.1%及0.9%。相信喺落實W股成為互聯互通交易股之前,呢個板塊將會不時落鑊炒作,不妨吼住回吐就低吸。另一個今日表現較突出嘅板塊係濠賭股,皆因內地長假將至,預期賭收下月有佳績,整個板塊皆有升幅,半日升幅由0.9%至2.4%不等。

大市方面喺結算前吽吽吓,呢個星期話就話跌足一個禮拜,不過其實跌幅唔算嚴重,講緊都係跌咗幾百點,雖然10日及20日線失守,但暫時29500點算守得住,估計喺下周一期指結算前,大市都唔會有乜動靜。今日成交又愈玩愈縮,周末前夕睇少半日,happy Friday。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads