隔晚美股早段腳軟,由於美伊再起衝突,道指曾跌逾百點,其後跌幅收窄,而內地股市亦持續疲弱,今早港股假期過後未見充電成功,都係有啲腳仔軟。恒指今早低開180點,早段曾跌207點,見過29755點一周低位,其後拗腰倒升18點,見過29881點半日高位,可惜受制10日線(30005點),三萬大關始終不保。恒指中午報收29938點,跌24點;國指跌53點,報收11715點。
內銀股為跌市元兇,四大行半日跌幅均超過1%,至於內險股個別發展,中國人壽(02628)發盈喜,半日升逾2%;平保(02318)半日升0.6%,其他保險股則偏軟。至於騰訊(00700)跟友邦(01299)則負起支撐大市嘅作用,前者半日升0.2%,早段曾升1%,暫時400元呢個阻力,未有耐可以突破,暫時騰訊喺385元至400元之間上落。十幾蚊波幅對於騰訊嚟講係濕濕碎,擺明係悶局一場。大笨象(00005)更加悶上加悶,個市已經嚟到30000大關,但大笨象70元呢個水平,仲係這麼近,那麼遠。
美伊再起衝突,刺激油價急升,三桶油嘅中石油(00857)同中海油(00883)齊齊升1.8%;但受油價急升拖累,航空股捱沽,三架紅色飛機齊齊墮機,國航(00753)跌6.3%、東航(00670)及南航(01055)分別跌7.7%及6.7%,國泰(00293)則跌2.6%。
手機設備股話咗仲有得去,舜宇(02382)及瑞聲(02018)分別升1.5%及3.5%,中興通訊(00763)升1.8%,而比亞迪電子(00285)半日升逾4%,始終呢隻估值較為落後,呢期追番升幅好正常。至於電訊網絡商喺整個5G建設過程中係最後先受惠,之前雖然三大網絡商炒過籠,呢期表現得較為憔悴,若然要炒5G概念股,呢三個紅色電話未係要接通嘅時候。
雖然非洲豬瘟未完全控制,但疫情稍為退減後,而農業農村部預期第四季活豬價格將突破2016年歷史高位,假期前已開始落鑊嘅萬洲國際(00288)今日繼續炒到出煙,半日升6.4%。不過阿Man認為高追無謂,有貨嘅反而諗下有糊先食。
上星期先話擔心內地房價有回升跡象,阿爺隨時出招打壓房價,轉過頭中央即打開口牌警告「房是用來住,不是用來炒」,內房股全線捱沽下跌,不過阿Man上周己曾警告,相信醒目缸邊友早已撤退。
老實講個市唔上唔落,望望下面唔少肥牛,當然上面嘅熊證夾夾埋埋都唔少,大戶可以兩邊通殺,唔係易炒,呢期都係炒股唔炒市。
麥狄文
(徐狄怡‧證監會持牌人 滙盈資產管理‧董事總經理)