|
熱門:

2019年4月16日 即巿股評 港股直擊

【盤房來料】資金流入較落後內銀股

隔晚美股牛皮,靜待業績期來臨,加上復活節長假期在即,市場資金變得審慎保守。至於港股噚日創十個月高位後倒跌,今日跌勢延續,其後喺內地股市抽升後,港股拗腰倒升,重返三萬點水平附近。

恒指低開56點,開市後跌幅擴大跌逾百點,見半日低位29665點,其後隨內地股市回升,港股中午後最多升198點,見半日高位30009點,半日報收29999點,升188點;國指升11763點,升131點。內地股市能夠回升,主要係人行喺公開市場暫停18日逆回購後重啟回購,被視為再度向市場放水。

重磅股方面,騰訊(00700)發力升1%,港交所(00388)升逾1%。噚日講過風水輪流轉,呢期輪到中資金融股發力,果然內銀股同內險股今日升勢延續,重磅內銀股建行(00939)、工行(01398)同中行(03988)分別升2.9%、2.4%及1.9%。內險股同樣受追捧,平保(02318)有大行唱好,話貴啲都係首選呢隻內險股,而財險(02328)跟人保(01339)亦獲大行提升投資評級,半日分別升1.9%及1.2%。之前阿Man講過,雖然中資金融股,尤其係內銀股表現較大市落後,但以大市累積咗咁多升幅之後,反而落後嘅內銀股更具防守性,作為中長線收息之用亦穩陣,如今內銀股終發力,有貨嘅缸邊友總算守得雲開。

其實資金近日喺唔同板塊之間流動,早幾日豬肉股同汽車股落鑊,今日呢兩個板塊腳軟,資金又回流至教育股跟醫藥股,前者有教育部近日提出完善扶持政策,半日教育股全線上升,個別股份升幅更超過一成。醫藥股升勢唔算強勁,但經過幾日調整,今日靠穩止住之前跌勢,唔排除跟住再發力。

講番個市走勢係較為反覆,不過嚟嚟去去個市跌又跌唔落,但再升多啲突破向上又無乜力,睇嚟長假期前都係20日線(29482點)較大支持,而10日線(29946點)點為好淡分界,暫時喺呢條線上下三兩百點徘徊,即係上面30200至30400點阻力不變,暫時睇位呢幾個位。

麥狄文
(徐狄怡‧證監會持牌人 滙盈資產管理‧董事總經理)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。